Ayera tardi durante un conferencia di prensa Algemene Rekenkamer Aruba (ARA) a anuncia e publicacion di nan rapport di investigacion titula “Op afstand, maar toch dichtbij.” E investigacion riba ta enfoca riba e instancianan cu ta poni riba un distancia di pais Aruba.

Drs. Mary Ann de Jong-Curet, Secetraria ARA, a splica cu esaki ta institucionnan cu ta ricibi fondonan publico den forma di, por ehempel, subsidio, un contribucion anual, un transferencia di capital di pais Aruba, of un entrada specifico regula pa ley. E instancianan aki ta dividi den institucionnan di derecho publico, empresanan estatal y fundacionnan publico.

E investigacion di ARA a bay mas profundo den e siguiente instancianan: Arubus NV, Post Aruba NV, Refineria di Aruba (RdA) NV, WEB Aruba NV, Serlimar y Fundacion Lotto pa Deporte.

De Jon-Curet a indica cu ayera mainta tambe ARA tabata den Parlamento di Aruba pa presenta e rapport aki na parlamento y entrega e rapport tambe na e ministernan concerni. E rapport ya caba ta publico y ta disponibel ariba website di ARA.

E rapport ta dividi den tres parti y pa loke ta trata e analisis financiero di e investigacion, nan a investiga e periodo administrativo di 2018 pa 2020. Presidente di ARA, drs. Xiomara Croes-Williams, a remarca cu pais Aruba tin un tarea pa salvaguardia interes publico. El a resalta cu servicionan publico ta di suma importancia pa e ciudadanonan y esakinan mester ta cofniable, pagabel y sostenibel.

El a indica cu desde Status Aparte pais Aruba a scoge pa na varios ocasion pone servicionan publico cu ta wordo brinda na e ciudadanonan na un distancia. Esaki, el a sigui splica, ta un caso caminda e responsabilidad ta cay bao di un minister, di un ministerio, pero den e operacionnan diario, e instancia ta independiente.

El a resalta cu e minister responsable ta haya autorisacion legal pa regla maneho, supervision y responsabilisacion di e instancianan aki.

Croes-Williams a splica cu pa diferente motibo, por ehempel pa eficiencia, e pais Aruba por scoge pa pone cierto tareanan gubernamental na un distancia di gobierno, locual por ta algo bon bao cierto condicionnan.

El a enfatisa cu prome cu pais dicidi pa pone e instancianan na un distancia di gobierno, ta importante pa pensa hopi ta bon pa pakico ta haci esaki y pakico un departamento gubernamental of un servicio gubernamental no por ehecuta e tarea aki.

El a sigui splica cu mester pensa hopi bon kico ta e meta y kico lo kier logra cu e independisacion di instancia. Otro punto importante ta tambe con ta bay paga pa esaki y kico ta e mecanismo di financiamiento pa esaki. Ademas di esaki, Croes-Williams a resalta, ta importante tambe pa e metanan cu a wordo fiha wordo logra tambe.

E presidente di ARA a spica cu e motibo cu a haci e investigacion ta cu for di e control di ARA di e cuenta anual di e pais Aruba pa hopi aña ta sali afo cu varios di e instancianan aki tin un deficit financiero grandi y aña tras di aña no tin ningun mehoracion.

Na aña 2011 caba ARA a haci un inventarisacion di sector publico y publica un yama ‘Publieke Secotr en Beeld’. Aworaki a actualisa esaki pa loke ta e instancianan poni na distancia y a bay mas profundo den e investigacion di e seis instancianan ya caba menciona.

Croes-Williams a remarca cu e meta di e rapport aki ta pa tin un bista riba e totalidad di e instancianan existente y tambe e riesgo financiero cu e instancianan aki por tin pa e pais y pa e finanzas publico. Den e investigacion a saca afo cu tin 44 instancia y den e rapport tin informacion detaya di e instancianan aki.

Cu e rapport aki, el a subraya, ARA kier sostene Parlamento di Aruba den nan ehecucion di nan tarea di controla e gobierno, y na su turno parlamento pa urgi e ministernan concerni pa tuma accionnan pa mehora e instancianan cu no ta funciona debidamente.

El a agrega cu e rapport por sirbi tambe pa yuda Parlamento y e minister nan pa ora cu crea instancianan nobo den futuro.

E ta un tema dinamico. Berdad nos a haci investigacion di tal tempo pa tal tempo, pero entre tanto, mane mi a bisa aworey nos a conta 44, entre tanto el a bira 45 pasobra recientemente parlamento a aproba un ley pa institucion di otro isntancia nobo, cual ta RWZI. Tambe den prensa nos por a lesa intencionnan pa independisa un dienst di gobierno y recientemente den prensa intencion pa lanta un otro isntancia mas di esakinan, Vacation Rentals,” Croes-Williams a remarca.

El a indica cu e investigacion aki tin hopi informacion y recomendacionnan di parti di ARA hopi valioso tanto pa e ministernan como pa parlamento.

Pa loke ta e seis instancianan cu ARA a profundisa den dje, e escogencia aki ta basa riba un analis di riesgo cu ta parti di e investigacion preliminar. Di e seis instancianan aki, tres empresa estatal tabatin resultado financiero negativo, cual ta Arubus, Post Aruba, y RdA y un empresa estatal tabatin un resultado financiero positivo, cual ta WEB. Un instancia di derecho publico, cual ta Serlimar , tabatin resultado financiero y e fundacion publico, Fundacion Lotto pa Deporte, tambe tabatin resultado financiero negativo.

Por lesa mas di e resultado y recomendacionnan di e investigacion y rapport di Algemene Rekenkamer den nos edicion di mañan.