Tres departamento di Gobierno ta considera cu falta di personal, como tambe absentismo como e motibo principal pakico e gastonan di overtime ta aumenta. Esaki ta un resumen di e investigacion di Auditoria General di Aruba, ARA titula ‘Motibo Aumento Overtime.” ARA a compila e estudio pa aña 2018 y a enfoca riba tres servicio cu ta Cuerpo Policial di Aruba, KPA, Instituto Coreccional di Aruba, KIA y Cuerpo Especial Arubano, CEA.

Otro motibonan pa e gasto di overtime ta varia pa cada servicio. Por ehempel, ARA ta bia cu overtime na KPA ta dependiente di e tipo di tarea cu cada seccion of ekipo ta haya. Otro factor cu tin influencia, ta con ta servicionan di piket ta opera y ehecucion di e asina yama tareanan cu no ta realmente pas den e responsabilidad di e servicio.

Pero tambe tin factornan di e medio ambiente cu ta determina pa e cantidad di overtime tanto na KPA, KIA y CEA. Tur tres ta reconoce otro factor cu tin su influencia riba e saldo di traha mas ora cu e regular, pero finalmente manera KPA a indica, e peso mas grandi ta keda e falta di personal y absentismo halto pa motibo di malesa.

Enfoke di e investigacion

Intencion di ARA ta pa duna bista riba e motibonan principal di trabaonan adicional na e servicionan menciona. E investigacion a dirigi riba e ultimo cinco añanan, esta di 2014 pa 2018 y a duna un imagen di e motibonan cu cada un di e servicionan tin pa haci uso di overtime (red. Ta trata e periodo di ex Minister di Husticia Arthur Dowers y actual Minister di Husticia demisionario Andin Bikker).

Pa tur tres a analisa con leu e maneho interno pa controla oranan adicional di trabao ta. Esaki dirigi na maneha y domina e gastonan di overtime. A basa e investigacion riba dos pregunta specifico, esta, cu tabata e motibonan principal cu den e ultimo cinco añanan a mira aumento di gasto, y cua ta e medidanan cu e mesun KPA, KIA y CEA, pero tambe e Minister encarga a tuma pa domina y controla e gastonan.

A tene entrevistanan na tur tres servicio y a haci uso di informacion cu tur tres a entrega. Pa por a haya un bista riba maneho di e Minister, a tene entrevistanan na e despacho concerni y a pidi tambe documentonan relevante. Tambe a bishita Departamento di Recurso Humano, DRH pa informacion, ya cu un di e tareanan principal di e departamento aki ta e conseho y desaroyo di maneho riba tereno di personal y organisacion.

ARA ta bisa den su rapport di ta consciente cu e investigacion aki ta unicamente mishi cu e superficie y cu ta limita su mes unicamente na e buskeda di motibonan principal di overtime. Unda cu tabata posibel a colecta documento. Un investigacion mas profundo lo mester saca afo si tin mas motibo pa cua e overtime ta asina halto of si e medidanan cu ta tuma ta suficiente, pa yega na e meta pa reduci overtime of si e medidanan aki tin e resultado desea.

Auditoria General di Aruba ta spera cu en todo caso e investigacion aki ta amplia e bista riba e tema y percura cu e discusion riba maneho efectivo riba gasto di overtime tuma luga. Door di haci investigacionnan similar, ARA ta stimula Pais Aruba pa tuma medidanan pa desaroya institucionnan efectivo, responsabel y transparente, cu ta den liña di e meta 16 di e Sustainable Development Goals, SDG.

Motibo di e investigacion

ARA ta motiva su investigacion basa riba e problema esencial di Pais Aruba, esta e gasto halto di personal. Ta e gasto mas halto di Aruba. Parti di e gasto di personal ta e pago pa overtime. Segun cifranan prelimitar di cuenta annual di Pais Aruba pa 2018, e gasto di salario y compensacion pa su personal tabata 324.129.151 florin ( un tiki menos cu 325 miyon florin). Riba e suma aki ta bin 98.535.375 florin (casi 99 miyon florin).

Relato ta continua riba pagina 7.