E acceso na informacion ta un pilar fundamental di un democracia saludabel y transparente. Recientemente, Sra. Aquannette A. Gunn, miembro di Parlamento, a bin ta enfrenta obstaculo pa haya e mas di 30 documento cu Minister Tjon a pone ‘ter inzage’ durante e Reunion Cera (Besloten Bijeenkomst) relaciona cu e ‘lease’ di helicopter pa KPA cu a tuma luga dia 21 di september ultimo.

Riba 25 di september Parlamentario Gunn a dirigi un peticion na e Minister Tjon pa asina conforme AB 1999 no 12, e Mandatario percura pa manda Parlamento un copia di tur e documentonan. Minister Tjon su contesta riba peticion di Sra. Gunn tabata uno negativo. Minister Tjon a hustifica su negacion riba e aspecto di confidencialidad y datonan personal di varios persona. E parti mas absurdo di su carta tabata unda e Mandatario ta pone su mes disponibel pa bin Parlamento un bes mas pa pone e documentonan ‘ter inzage’.

Riba 6 di october Sra. Gunn a dirigi un carta na Minister Tjon haciendo peticion un bes mas pa ricibi e documentonan. Den e carta el a accentua riba varios aspecto, entre otro:

E rol crucial cu Parlamento tin cu desplega pa loke ta e supervision di e maneho di Gobierno y garantisa transparencia y responsabilidad di nos sistema democratico.

Derecho di Parlamento pa haya informacion ta ancra den articulo III.17 di nos Constitucion. Den e mesun articulo ta elabora cu e unico momento cu e Mandatario por haci un excepcion di no cumpli cu su deber pa facilita informacion na Parlamento ta den caso cu e informacion ta bay contra e interes di e Pais of di Reino.

E Parlamentario a hasta elabora cu tin forma con pa garantisa e privacidad, sin cu e Mandatario tin cu keda sin cumpli cu su deber, door di por ehempel anonimisa e nombernan.

Sra. Gunn ta considera e motivacion cu Minister Tjon a duna pa no comparti e documentonan y pa pone su persona disponibel pa bin Parlamento un bes mas y pone tur documento ‘ter inzage’ como un falta di respet. Pues no ta su competencia como Minister determina con, na unda y ki ora mi ta haci mi trabou na e manera mas efectivo y responsabel.

Parlamentario Gunn un biaha mas ta bisa enfaticamente cu e bala ta den scochi di Minister Tjon, pero loke si e kier laga bon cla ta cu Parlamento tin e obligacion di ta critico pa mantene un nivel halto di transparencia y responsabilidad di nos Gobierno.

Pa finalisa Sra. Gunn ta haci un apelacion na Gobierno pa busca un balansa entre proteccion di informacion y transparencia, y pa garantisa cu e representantenan di e pueblo tin e acceso necesario na informacion pa por haci nan trabou cabalmente.