Aquannette Gunn ta un docente cu un trayectoria di 20 aña den enseñansa y ta un candidato fuerte pa representa partido MAS den parlamento di Aruba.
Bon Dia Aruba a acerca señora Gunn pa un entrevista pero no a logra ricibi contesta prome cu e publicacion a sali.
Den un video ariba e pagina di Facebook di señora Gunn, e ta describi su mes como “un persona disciplina, un persona determina, un persona profesional, un persona responsabel y husto”. E ta splica cu e motibo principal di su participacion activo den politica pa e eleccionnan recien, ta paso e ta kere firmemente cu pais Aruba su enseñansa merece miho.
“Mi metanan ta na enseñansa integral, participacion real, principalmente di tur esunnan cu ta traha den enseñansa, inversion den e recurso humano, igualdad y inclusion. E educadornan tambe tin cu haya e estimulo y nan tin cu recupera e positivismo, e motivacion y tambe e confiansa”, e ta bisa.
Den e video tambe, señora Gunn ta referi na e situacion actual di enseñansa como un situacion hopi fragil. “E ta un situacion cu ta rekeri di un recuperacion pero a corto plaso pa motibo cu e educacion a keda neglisha pa hopi tempo” señora Gunn ta bisa.
Señora Gunn tambe ta bisa cu e sistema di educacion mester ta uno dinamico y participativo, y cu e docentenan mester ta ekipa cu e material necesario pa asina nan por haci nan trabou na nivel y tambe nan mester keda profesionalisa continuamente, pero señora Gunn ta sigura cu durante e ultimo aña nada di esey tabata e caso.
Den su video tambe e ta papia tocante e prome aspecto cu e lo pone atencion na dje den e prome 100 dianan den parlamento, si en caso e forma parti di e parlamento nobo. “E prome aspecto ta pa mi por haya acceso na e investigacion cu a keda haci pa loke ta trata e educacion di Aruba, caminda bo tabatin expertonan di Hulanda, tabatin expertonan di Aruba, eventualmente di Corsow y Sint Maarten, caminda nan mester a evalua e calidad, e nivel di enseñansa”, señora Gunn ta bisa. “Ta sumamente importante pa ora cu bo tin e resultado y kico ta e maneho cu bo tin cu bai implementa pa loke ta trata educacion pa asina nos por sinta na mesa y renegocia cu Hulanda”, e ta bisa.
E ta enfatisa tambe ariba dialogo continuo cu esunnan cu ta labora den mundo di enseñansa, pa “laga nan tin un rol participativo, ekipanan cu e materialnan necesario y dunanan e profesionalisacion cu nan tin mester pa asina nos por traha conhuntamente pa e bienestar di educacion di Aruba” señora Gunn ta bisa.
