Parlamentario Aquannette Gunn a manda un carta cu cantidad di pregunta dirigi na e minister encarga cu Labor, Energia y Integracion sr. Glenbert tocante dos biahe di trabou realisa recientemente pa Washington DC y Ecuador. Prome cu e biahenan aki e mandatario a informa cu lo bay sondea e posibilidad pa por haya heavy fuel oil (HFO) na un prijs mas bentahoso pa WEB Aruba NV.
Parlamentario Gunn ta desea di ricibi contesta di cuanto persona a acompaña e minister durante ambos biahe y den cuadro di ki experticio nan a asesora minister den e biahenan aki.
Mirando cu ingenieronan experto a informa cu e HFO cu e mandatario lo kier busca for di Venezuela como ta uno di menos calidad, parlamentario Aquannette Gunn kier sa di minister Croes por garantiza cu e HFO lo ta adecua pa uza den WEB Aruba NV.
Desde 10 di oktober 2022, WEB Aruba N.V. a informa cu a haya oportuno pa hedge na $77 pa bari, parlamentario Gunn ta desea pa minister informa parlamento tocante e tipo di hedging cu segun e director di WEB Aruba N.V. ta uno flexibel y si e mandatario por comparti cu Parlamento e articulo den e acuerdo di hedging unda ta ratifica e flexibilidad di dicho seguro.
Minister Croes a elabora cu durante su estadia na Ecuador a bin cu e proposicion pa “Flotas Petroleras de Ecuador” (FLOPEC) uza Aruba como nan base logistico (hub) pa distribucion di petroleo den region. Parlamentario Gunn ta desea pa Minister por informa Parlamento di e grado di optimismo cu e tin pa logra convence e ehecutivonan di FLOPEC pa haci uzo di e tankinan riba tereno di RDA y finalmente si e mandatario por informa Parlamento cua islanan of paisnan den region ta cumpra petroleo for di Ecuador y di cual Ecuador lo por distribui e petroleo haciendo uzo di e base logistico di nos isla
