(CuraçaoChronicle) – Caracas Bay awo ta ekipa cu Smart LED como parti di Aqualectra su proyecto pa reemplasa e luznan riba caya cu luznan LED na Corsou.
CEO di Aqualectra, Mr. Darick Jonis, a indica cu e compania ta cla pa drenta e barionan cu Smart LED y cu luznan riba algun caya ya caba a keda completamente reemplasa.
Reemplasa luznan convencional riba caya cu Smart LED no solamente ta duna e isla un imagen diferente, sino tambe esaki lo aumenta e siguridad na barionan di Corsou. Aunke Aqualectra te ainda ta premira cu lo tin desafionan den reemplasa luz den algun bario, e compania a indica cu si tur cos bay di acuerdo cu e plan, mas di 33,000 punto di luz na Corsou lo keda reemplasa pa LED pa fin di aña 2024.
Aqualectra ta sigui traha cu gobierno pa sigura cu e proyecto keda ehecuta di e manera mas eficiente y safe. E compania tin e meta di completa e proyecto aki lo mas pronto cu ta posibel pa asina e isla por disfruta di e beneficionan cu Smart LED ta trece, tanto den iluminacion y bunitesa pa e isla.
