Riba un 26 di april di 1920, Juan Chabaya Lampe a nace den Nassaustraat y a bira un di e Arubanonan mas stima den e historia di nos isla.

Padu lo keda semper den curason di Aruba door cu el a compone varios cantica special dedica pa mamanan y tambe a copia ‘Sonrisa di un baby’ di e cual el a skirbi den tres idioma. Den mesun manera, el a crea e himno nacional ‘Aruba Dushi Tera’ hunto cu Rufo Wever , e cual Parlamento di Aruba a aproba oficialmente como himno di Aruba na aña 1976.

Otro cantica cu por wordo considera manera un segundo himno pa Aruba, ta e composicion cu el a dedica pa su casa Daisy Croes ‘Abo so’, ken despues a fayece na aña 1994.

El a nace e dia 26 di april di 1920 y a keda un persona popular den Antias Hulandes y den Caribe como pianista, cantante, autor y pintor. Padu Lampe tabata un artista local cu a bira hopi famoso na Venezuela, Colombia, Merca y Hulanda. Na decada di añanan 50, el a logra bende no menos cu 50 mil copia di su ‘Longplay’.

El a crece den un ambiente cu hopi alegria musical. P’esey su interes pa e musica a cuminsa Desde 12 aña e tabatin agilidad riba clarinet, mandolin y cuarta. Henry Lampe su tata, tambe tabata bon conoci como un pianista y musico

Den un publicacion di e semanario informativo ‘Observador’ di e dia 1 di augustus di aña 1962, a resalta e meritonan artistico di Padu y tambe su personalidad sumamente agradabel. Nan a destaca cu Padu tabatin tres merito como pianista cu un estilo hopi personal y yen di sorpresa. Na di dos luga e compositor cu no tabata conocedo di teoria musical, pero el a demostra invencion den su composicionnan y di tres luga, Padu del Caribe como propagador di musica crioyo na hopi luga rond di mundo.

Un di e momentonan mas importante cu el a wordo presencia tabata e dia cu e prome emisora di radio di Aruba a habri dia 20 di maart di 1954, unda e tabata acompaña pa guitarista Antiyano Julian Coco y Hubert “Lio” Booi.

Riba tereno di arte y pintura tambe el a demostra su destreza. Durante su hubentud, el a pinta un cantidad di cuadra den su propio estilo y na aña 1939, el a participa den un exhibicion na New York y a gana un medaya di brons cu su cuadra ‘Typical view of Aruba’.

Padu Lampe tabata un artista multifacetico, inspira pa su interes den parasicologia y fenomenonan sobrenatural. El a skirbi tres buki riba e topico aki na papiamento na aña 1986 y cu a wordo publica pa Imprenta Nacional Arubano cu yudansa financiero di Prins Bernhard Fonds Nederlandse Antillen.

Ademas di esey, na aña 1964, Padu a pasa su examen na ‘Society to Advanced Ethical Hypnosis’ na New Yersey ora el a haya e certificado di hypnotechnician, cu segun e ley na algun estado di Merca, tabata autorisa e poseedo pa practica hipnotismo den casonan como kibra bicio di humamento, uzo di alcohol y droga, asina como tambe trata casonan netamente medico.

Den transcurso di añanan el a ricibi diferente plakkaat y diploma di reconocemento tanto di Aruba como di Corsou, Venezuela y Hulanda.

Padu del Caribe a bay sosega dia 29 di november 2019 na edad di 99 aña, na unda cu su musica Padu a hiba e cultura Arubiano rond di mundo. Henter isla lo recorda pa su gran contribucion pa cu arte, cultura y herencia.