Apple a bisa cu Facebook no por sigui distribui un app cu tabata paga usuarionan, incluyendo adolescentenan, pa track extensivamente nan uzo di celular y internet.
E blog di tecnologia, TechCrunch, a reporta diamars cu Facebook a paga como $20 cada luna pa uza e app Facebook Research. Mientras Facebook ta bisa cu esaki a wordo haci cu permiso, e compania tin un historia di tuma libertad cu e definicion di ‘permiso’, como tambe di sconde e data cu e ta colecta.
Facebook ta bisa cu menos di 5 porciento di e usuarionan di e app tabata adolescente, y cu nan tabatin permiso di e mayornan. Sinembargo, e revelacion ta bira un mancha mas riba e record di Facebook pa locual ta privacidad, y lo por duna espacio pa mas escutinio regulatorio.
Segun TechCrunch, Facebook a pasa rond e app store di Apple y su reglanan mas fuerte pa privacidad. Apple ta bisa cu Facebook tabata uzando un mecanismo di distribucion pa empleadonan, no clientenan, pues Apple a revoca e capacidad ey. Desde ayera, un revelacion riba Betabound, un di e servicionan cu a distribui Facebook Research, a informa usuarionan prospecto cu door di instala e software, nan ta permiti Facebook pa colecta un cantidad di data. Esaki ta inclui informacion tocante app cu bo tin instala, ki ora bo ta uza nan y kico bo ta haci riba nan. Informacion tambe ta wordo colecta riba con otro hende ta interactua cu e usuarionan y nan contenido riba e appnan menciona, segun e revelacion.
Betabound a adverti cu Facebook por colecta informacion hasta ora un app of browser ta uza cifrahe (encryption). Investigado di siguridad di app di celular, Will Strafach, kende a studia e app pa Tech Crunch, a bisa AP cu e tabata spanta di descubri Facebook violando confiansa di Apple. El a bisa cu hermentnan pa captura trafico di e forma aki mester wordo uza internamente so, pa socionan den confiansa. Na luga di esaki, el a bisa Facebook tabata grabando tur trafico di data drentando y saliendo di miembronan di publico cu no tabata na altura di esaki – riba un app diseña pa adolescentenan. “Esaki flagrantemente no ta permiti”, segun Strafach, CEO di Guardian Mobile Firewall, “Ta impresionante con desafiante Facebook a comporta.”
El a bisa cu cualkier intento di Facebook pa bisa cu e usuarionan cu a instala e app tabata compronde e amplitud di e coleccion di data ta un distraccion. “Mi no ta kere cu nan a haci e hopi cla pa e usuarionan precisamente ki nivel di acceso nan tabata duna cu nan permiso”, Strafach a bisa. “Simplemente, no tin manera cu e usuarionan tabata compronde esaki.”
