(AP) – Si e Cas Blanco no interveni den un discusion internacional di patent, e dos holoshinan mas recien di Apple no lo ta disponibel pa benta na Merca.
Apple tin plan di suspende e benta di su Apple Watch Series 9 y Ultra 2 pa clientenan online na Merca cuminsando for di diahuebs atardi y den su tiendanan cuminsando riba diadomingo. E movida ta bini for di un decision tuma den october di parti di International Trade Commission unda a restringi e funcion di midi e oxigeno den sanger di e Apple Watch como parti di un discusion tocante propiedad intelectual cu e compania di tecnologia medico Masimo.
E Cas Blanco tabatin 60 dia pa revisa e ordo otorga pa ITC riba 26 di october, nificando cu Apple por a sigui e benta di e dos modelonan afecta na Merca. Sinembargo e compania na Cupertino, California a bisa dialuna cu nan lo pausa e benta prome cu e deadline pa asina por cumpli cu e ordo di ITC. Secretario di Prensa di Cas Blanco Karine Jean-Pierre a bisa cu e administracion Biden ta monitor e caso di Apple Watch. El a comenta cu Representante Katherine Tai tin e autoridad pa tuma un decision tocante esaki y cu e ta “cautelosamente considerando tur e factornan den e caso.” Jean-Pierre a bisa cu e no kier adelanta na cualkier decision cu Tai lo por haci.
E strobamento aki lo costa Apple entre 300 pa 400 miyon dollar den benta a causa di e temporada festivo actual, segun analista Dan Ives a calcula. Esaki ta relativamente tiki pa Apple, mirando cu analistanan ta premira cu Apple lo genera casi 120 biyon dollar den benta durante e periodo di october te cu december. E suspension di e benta di Apple Watch “no ta cambia e pronostico aki hopi pa e compania, pero esaki no ta kita cu e ta un mal momento pa e problema aki surgi,” Ives a comenta.
Si e suspension di benta riba e dos modelonan di Apple Watch no keda retira, Apple a compromete di “tuma tur medida” pa sigui cu e benta di Series 9 y Ultra 2 na Merca lo mas pronto posibel. Apple Watch SE, cual no tin e funcion aki, lo permanece na benta na Merca despues di pasco. E holoshinan cumpra caba cu si tin e funcion di midi e nivel di oxigeno den sanger no ta afecta pa e ordo di ITC.
