(AP) – Apple a bisa cu nan lo lansa un opcion “lockdown” pa tur iPone, iPad y computer Mac cual tin e intencion di proteha contra di programacionnan di hacking cu hackernan cu sosten di estado a traha, aunke activa esaki ta causa cu e dispositivo lo bira menos util.
E anuncion aki haci diaranson ta ilustra cu nisikiera Apple, cual ta e compania mas valioso den mundo, tin e manera di adecuadamente proteha iPhone y su otro productonan contra di hackernan di estado y programacionnan di spionahe cibernetico comercial. Gobierno a usa e hermentnan aki pa e privacidad di reporteronan, topiconan politico y activistanan di derechonan humano.
E funcion nobo aki, yama ‘Lockdown mode,’ lo ser inicialmente ofreci como un version di test pa asina e investigadornan di siguridad por yuda Apple identifica si tin algun fayo of mester mehora algo. Apple usualmente ta lansa su actualisacionnan grandi na su sistema di operacion den fin di september.
Mientras cu solamente un cantidad chikito di pais tin e recursonan pa desaroya hermentnan pa hack dispositivo nan mes, companianan priva manera Israel su NSO Group tin hopi tempo caba ta bende programacion di hacking na agencianan di gobierno mundialmente pa añanan largo caba.
E problema cu ta creciendo di hackernan contrata a causa cu Apple aña pasa a pone un demanda federal den contra di NSO Group pa motibo cu nan a hack varios iPhone y otro productonan Apple. Den su keho, Apple a acusa empleadonan di NSO Group di a crea “un mashin altamente sofistica cu ta motiva abuso como rutina.”
NSO, cual ta den blacklist di U.S Commerce Department, a nenga di a haci cualkier acto contra di ley y a bisa cu su productonan a ser usa pa intercepta y aleha abusadornan di mucha y teroristanan.
Diferente na e opcionnan di siguridad cu Apple ya caba tin den mayoria di su programacionnan, e compania su funcion ‘lockdown’ tin e meta di fungi como un boton di emergencia cu Apple ta premira lo ta necesario solamente pa un cantidad chikito di nan usuario.
E medida di lockdown ta considera un opcion di ultimo momento pa personanan cu ta ser ataka pa e programacionnan di spionahe aki, mirando cu pa medio di activa e funcion aki, varios funcion popular di e dispositivo no lo funciona. Esaki ta inclui manda potret of link adhunto den mensahenan di texto, e funcion di ricibi yamadanan di FaceTime for di numbernan nobo y uso di sitionan web lo keda limita.
Apesar di esaki, Apple ta sinti cu e proteccion extra aki lo ta valioso pa activistanan, reporteronan y otronan cu ta cay victima di hacking di parti di gruponan grandi cu e fondo pa haci esaki. Usuarionan lo por activa y desactiva ‘lockdown mode’ na ki momento cu esaki bira necesario of na momento cu nan kier.
E uso di comunicacion codifica via aplicacionnan manera WhatsApp y Signal a causa cu e gobiernonan a cuminsa busca ayudo di comerciantenan di programacionnan di spionahe pa asina por haya informacion tocante e suheto den cual nan ta interesa, cual ta haci e funcion aki uno necesario pa diferente grupo di persona.
