Buro Prevencion di Desaster (Bureau Rampenbestrijding) lo lansa un app pronto pa asina alerta pueblo ora di mal tempo.
Esaki e instancia ta informa ayera durante un conferencia di prensa riba e temporada di horcan cu a cuminsa y ta dura te cu fin di november. Hefe suplente Rino Hermans ta splica cu pronto lo informa pueblo con pa download e app aki. Meteo, polis y instancianan manera Salud Publico lo uza esaki pa alerta publico.
Sr. Hermans ta splica tambe e diferencia entre e fase di alerta y alarma. E prome fase ta uno di alerta unda instancianan lo informa comunidad di e situacion. Pues no ta e caso cu ora mal tempo ta pasa, lo tin un situacion di alarma, segun sr. Hermans. E unico persona cu por anuncia cu a cambia pa e siguiente fase di alarma, ta e prome minister, segun e. E prome minister ta e unico persona cu por haci esaki, asina sr. Hermans ta bisa.
Un otro punto cu e hefe suplente di Buro di Prevencion di Desaster kier remarca ta cu hende mester tene cuenta cu nos ta bibando riba un isla y den caso di un horcan ta pasa, yudansa internacional lo tarda. Mester tene cuenta cu esaki lo dura tres dia y e ta conseha pa famianan ta prepara pa sobrevivi riba nan mes pa tres dia. Pues cu nan mester suficiente cuminda y awa pa cada miembro di famia, sr. Hermans ta enfatisa.
17 shelter
Segun e hefe suplente, nan ta prepara den caso un horcan lo pasa. E plan ta revisa manera nan ta haci regularmente y aña pasa specificamente despues horcan Matthew. Nan ta train e plan tambe. Ora di un calamidad, e cuater instancia brandweer, polis, departamento di Salud y departamento di Asuntonan Social lo ta encarga. E ultimo ta encarga cu e parti di shelter, cu awor a resulta cu tin 17 ( na luga di mas cu 20 cu tabata den e ultimo plan cu Bon Dia Aruba a mira).
