(AP) – E app di mensaheria encripta Signal ta parce di a keda blokea na China continental, e ultimo servicio di rednan social stranhero cu a stop di funciona den un pais unda gobierno ta controla estrictamente e fluho di informacion.
Desde diamars, e usuarionan di e app na China mester a conecta na un red priva virtual (VPN) cu ta permiti nan aludi e asina-yama ‘Great Firewall of China’, un sistema di censura cu ta blokea e sitionan web, servicio y appnan cu e gobierno Chino ta considera inapropia.
E medida pa silencia Signal, un di e poco appnan di mensahe cu ta keda na China cu ta permiti usuarionan participa den mensahenan cifra (encrypted), ta produci na momento cu China ta aumenta control pa moldea e opinion publico y den ocasionnan, ta limita e discurso priva.
Usuarionan na China a bisa diamars cu no por a conecta na e app sin un servicio di VPN. No por a manda mensahe y no por a haci yamada.
Na China, servicionan manera Facebook, Google y Twitter tin añanan blokea. Mas recientemente, e plataforma popular di audio social, Clubhouse tambe a stop na e pais, tiki despues cu usuarionan Chines di e app a cuminsa participa den discusionnan di audio en bibo, considera sensitivo pa autoridadnan, manera e tema di detencionnan masivo di Uighur na Xinjiang.
Zhao Lijan, vocero di Ministerio di Relacionnan exterior di China, a bisa den un rueda di prensa diamars cu e ‘no tabata al tanto di e situacion’ rond di e prohibicion di Signal den China.
“Loke por a bisa nan ta cu, como principio, internet na China habri y gobierno Chino ta gestiona e asuntonan relaciona cu internet di acuerdo cu ley y regulacionnan,” Zhao a bisa.
No a logra tuma contacto cu Signal pa comentario.
Signal ta cifra di cada banda pa su servicionan di mensahe y yamada, loke ta evita cu un tercero por mira e contenido di combersacion of scucha yamada.
Recientemente, e app a bira popular entre e usuarionan di China preocupa pa e problemanan di privacidad, aunke e cantidad di usuarionan di Signal den e pais ainda no ta chikito den comparacion cu e omnipresente app di mensahe WeChat. WeChat tin mas di mil miyon di usuario y e ta un pilar di e bida diario na China, danki na su servicionan di pago y funcionnan di rednan social.
Sin embargo, e mensahenan y e contenido politicamente sensibel den WeChat diariamente ta censura y e autoridadnan a detene usuarionan pa difundi rumornan online. E mensahenan en WeChat ta cifra solamente entre su sirbidonan y e dispositivo di e usuarionan y, den teoria, Tencent, empresa matriz di WeChat, por sede na nan.
Pa evadi e censura di China y sede e sitionan manera Twitter of Facebook, usuarionan na China usualmente ta usa servicionan VPN,aunke e uso di dichonan servicio pa sede na servicionan blokia ta ilegal den e pais.
