REINO UNI (CNET.com) – Appnan popular di video y livestreaming, manera TikTok, ta bou scrutinio di parti di organisacionnan caritativo na defensa di mucha na Reino Uni.
“Nos sa cu un cantidad significante di mucha ta wordo contacta via appnan di livestreaming popular, manera TikTok, door di abusadonan cu ta uza nan como un campo di caza”, un vocero di e National Society for the Prevention of Cruelty to Children (NSPCC) a bisa weekend ultimo.
NSPCC a bisa cu nan a entrevista 40,000 mucha di edad escolar, y a descubri cu 25 porciento di nan a livestream cu un hende desconoci. Un di cada 20 mucha a wordo puntra, mientras nan tabata livestreaming of den comentario riba un video cu nan a post, pa kita nan paña, segun NSPCC.
TikTok ta rekeri usuarionan pa tin mas di 13 aña di edad pa uza e app, pero no tin forma pa sigura cu e usuario ta bisando berdad. Varios scol Britanico a adverti mayornan tocante e app, segun e Mirror a raporta diasabra.
Barnardo’s, un caridad Britanico prominente, a reporta cu nan ta mira mucha di hasta 8 aña ta wordo explota sexualmente online.
“Ta yuda ora scolnan ta comparti informacion cu mayornan tocante riesgo potencial online”, presidente ehecutivo di Barnardo’s, Javed Khan, a bisa. “Muchanan mester scucha constantemente mensahenan na scol y na cas tocante con pa ta sigur. Tambe nos ta curasha mayornan pa tin combersacionnan honesto y habri cu nan yiunan tocante ki website nan ta uza, y cu ken nan ta papia online – como tambe sigura cu nan tin e settings di siguridad corecto.”
Ademas di comentarionan sexualmente abusivo, buskeda riba TikTok a mustra contenido cu ta parce di promove desorden alimenticio y autolesion.
TikTok no tabatin un respuesta inmediato ora el a wordo contacta pa comentario.
