(NLTimes) –Cantidad di persona na Hulanda eroneamente a ricibi un certificado di vacunacion pa Covid-19 riba e app CoronaCheck di gobierno, siendo cu nan no ta completamente vacuna contra e malesa, segun un vocero pa ministerio di Salud a bisa Nu.nl.

“Varios miles di persona” pues por a genera un codigo QR usando e app pa haya acceso na varios club nocturno y eventonan durante weekend, e prome weekend cu por a usa e app pa haya un certificado di vacunacion.

A identifica y resolve e problema ayera. E app ta conecta na un sistema cu ta compila data for di cantidad di otro sistema. E problema por a tuma luga pasobra nan ‘no tabata conecta adecuadamente, of tabatin un check mark eroneo algun caminda’, e vocero a bisa.

Certificadonan di vacunacion falso no por wordo genera pa e app mas. Esnan cu no ta completamente vacuna por genera un codigo QR pa haya acceso na varios sitio door di haya un resultado negativo pa test di coronavirus dentro di 40 ora di entrada.

Sinembargo, cantidad di hende simplemente a ricibi un resultado di test negativo como regalo si nan a haya inconveniencia pa rijnan largo y retrasonan na e centronan di test Testen voor Toegang como resultado di un atake cibernetico diabierna. Un reportero pa NH Nieuws a bisa cu el a keha di e retraso, y un empleado a dun’e un resultado di test negativo no reclama, maske e nunca a haci un test en realidad. E noticiero a bisa cu su storia no tabata unico.

“Esaki ta berdaderamente un berguensa, mi ta curioso kico lo mustra aki dos siman pa loke ta trata infeccion”, e reportero, Maaike Polder a bisa.

“Hopi a bay bon, pero no tur”, minister di Salud, Hugo de Jonge a tweet, cu e hashtag ‘#trahandoribadje’.

Cantidad di usuario siman pasa a identifica e problema comun cu e app no lo permiti nan genera un certificado di vacunacion. Esaki a keda reporta pa hende cu anteriormente tabata infecta pa e virus SARS-CoV-2, cu GGD tabata na altura di e infeccion, y pues nan a ricibi solamente un inyeccion di vacuna Covid-19 segun politica di vacunacion Hulandes. Hulanda ta considera e personanan aki ‘completamente vacuna’.

De Jonge a bisa den weekend cu ta spera cu e problema lo keda drecha den weekend. Sinembargo, pa diadomingo anochi, representantenan di e ministerio a sigui bisa usuarionan di Twitter cu nan tabata na altura di e problema y lo mester keda resolvi dentro di algun dia.

E hende mas negativamente afecta ta esnan cu a ricibi e vacuna di GGD entre april y comienso di juni, un vocero di e ministerio a bisa ANP. E problema ta relaciona na e procesamento di data di hende cu a ricibi vacuna e lunanan aki. A haci ‘trabao duro’ durante weekend pa purba y drecha e problema, pero no ta completamente resuelto.

E ministerio si a aumenta e cantidad di persona cu awo por conecta na e app CoronaCheck simultaneamente pa solicita nan certificado di vacunacion. Esey a keda ordena despues cu e app continuamente a time-out pa cantidad di usuario siman pasa.