App di educacion ta revela informacion sensitivo di usuarionan

8Belts, creador di app di aprendisahe di lenguahe, a leak informacion personal sensitivo di centenares di miles di usuario rond mundo for di un cloud database no sigura, segun investigadonan a bisa den un reporte. E informacion a inclui number di identidad nacional, como tambe nomber, e-mail adres, y number di telefon.

E database tabata accesibel na cualkier persona cu e IP address corecto, desde sikiera dia 15 di april, ora cu investigadonan Noam Rotem y Ran Locar a encontra esaki online como parti di un proyecto cu ta descubri database exponi riba internet. E investigadonan a publica nan hallazgo cu vpnMentor, un website cu ta revisa rednan virtual priva (virtual private network, vpn) y ta gana comision ora un lector click riba su link y cumpra productonan. E record mas trempan di e database 8Belts, cu desde e momento ey a bay offline, tabata for di 2017.

E compania tin clientenan rond mundo, y investigadonan a haya informacion di usuarionan den casi tur pais, nan a bisa. Website di 8Belts ta cita cantidad di compania mayor como cliente, incluyendo gigante di comunicacion mobil Huawei, retailer di ekipo di deporte Decathlon, y compania di auditoria multinacional PricewaterhouseCoopers. Mayoria di e informacion den e database tabata bin di paisnan Hispano, segun e investigadonan.

8Belts, basa na Spaña y ofreciendo curso di Ingles, Frances, Aleman y Chines, no a contesta peticion pa comentario.

Data exponi ta crea riesgo di hortamento di identidad, como cu criminalnan ta usa informacion horta di companianan pa habri lineanan nobo di credito. E tambe por ser abusa pa companianan di marketing y hende fraudulento, kende por tuma contacto cu hende usando e-mail y telefon cu a haya online. No ta cla si otro persona cu e investigadonan tabatin acceso na data di 8Belts.

Mientras mas compania ta move informacion den e cloud, hopi biaha nan no tin e experticio pa haci esaki di forma sigur.

Database di 8Belts tabata teni den Amazon Web Services (AWS). Proveedonan di cloud no ta set up e database, y ta responsabilidad di un compania pa warda data di clientenan di forma sigur unabes e ta den e cloud.