App di notificacion di coronavirus di gobierno Hulandes, CoronaMelder, lo ser lansa a traves di Hulanda dia 1 di september proximo, segun minister Hugo de Jonge di Salubridad Publico a anuncia den un carta na parlamento. Prome cu esey un cantidad di test practico y di siguridad lo tuma luga, y Autoridad di Proteccion di Data Hulandes lo evalua e app.
E app tin como meta pa ta un suplemento pa tracing di fuente y contacto di pashent di coronavirus di servicio di salud GGD. E idea ta cu si un persona test positivo pa Covid-19, lo hinca esey den e app, cual lo manda un notificacion na tur celular cu tabata cerca di e pashent mientras nan tabata posiblemente contagioso.
Uso di e app ta completamente boluntario, y no ta warda data di usuario of nan ubicacion, e minister a insisti. Actualmente e ta trahando riba legislacion pa sigura cu hende nunca ta ser forsa, directa- of indirectamente, pa usa e app si nan no kier. Por ehemplo, un restaurant no por haci uso di CoronaMelder obligatorio prome cu permiti entrada na un persona.
Actualmente ta test e CoronaMelder cerca algun centenar di hende na Twente, manera Bon Dia Aruba a reporta. For di dia 17 di augustus, lo realisa e test den practica den region Twente y Rotterdam-Rijnmond. E intencion ta pa lansa e app na nivel nacional dia 1 di september.
“Nos mester haci tur loke nos por pa preveni un segundo ola di corona”, De Jonge a bisa. “Cu e app nos por catch e virus mas lihe y preveni infeccion. Mas hende cu download e app, miho. Nos ta e dijk cu por stop e segundo ola.”
