Den cuadro di despedida di sra. Ivonne Spellen como presidente di fundacion di Hende Muhe den Dificultad, minister di Asunto Social, sr. Paul Croes a bisa cu un instancia asina cu sigur a lucha durante dos decada contra e problematica aki, ta mustra cu nan tin e cuido na momento cu e caso ta sosode.
“Nan tin e espacio pa por tuma e persona den proteccion. Y tambe pa por trankilisa e situacion y asina e autoridadnan por actua…”, el a declara. Segun e mandatario, gobierno di su banda den e caso aki ta subsidia e fundacion aki cu un coordinador. Tambe nan ta tratando di yega na un apoyo financiero adicional como cu e trabou di e fundacion aki ta hopi grandi.
Di otro manera –segun minister Paul Croes- nan ta apoyando e fundacion precisamente pa nan por recauda fondo. E proyecto Feria Social cu nan a lansa recientemente lo contribui cu 15 mi florin adicional na e fundacion aki. E fundacion aki lo duna guia tambe na e hobennan di e Feria Social pa nan sa cual ta e problema den nos sociedad, y e tarea cu e fundacion aki ta bin realisando pa casi 21 aña. E embergadura di problematica aki contra hende muhe ta grandi, y mirando e keho den pasado di falta di fondo y subsidio cu e fundacion aki a yega di vocifera, e mandatario a indica cu nan kier sigui apoya nan.
Ayudo adicional
Aunke inicialmente el a contribui den e celebracion sorpresa gañando sra. Ivonne Spellen cu nan ta sostene un reunion cu minister Bermudez pa asunto di subsidio. Pero igualmente minister Croes a bisa cu recientemente nan a entrega un peticion na Conseho di Minister pa asina minister di Finansa, sr. Angel Bermudez lo por aloca mas subsidio pa e fundacion aki.
“Nos ta na spera di un conseho for di departamento di Finansa, y mirando tambe e aspecto presupuestario, ki efecto esaki lo tin”, el a declara. E ta sigur cu Conseho di Minister tin atencion pa no solamente abuso di mucha, pero di abuso den termino general riba hende muhe y riba nan famia. Pero tambe departamento di Asunto Social cu pronto lo conoce un director nobo ta encarga di duna guia na e señoranan cu ta pasa dor di abuso. E ta elogia e aportacion di CEDE Aruba cu tambe ta duna e apoyo pa hende muhe por desaroya nan mes.
Tambe e ta sigur cu su colega femenino, sra. Michelle Hooyboer-Winklaar cu ta encarga cu e maneho di desigualdad di genero ta pone su atencion na e problematica aki. Ya cu e ta un persona cu ta para hopi fuerte pa e derecho di hende muhe y contra abuso di hende muhe.
