Desde varios aña ta parti di e maneho di emision di tereno erfpacht pa proyecto di un cierto tamaño, cu ora otorga e tereno e compania desaroyador ta obliga di haci un donacion na un instancia caritativo, o en todo caso un organisacion cu meta no comercial.

Esaki, segun filosofia explicita den un publicacion reciente di ministerio di Desaroyo Teritorial, Infrastructura y Medio Ambiente, ta como gesto pa suaviza e impacto negativo socio-economico cu e cantidad creciente di proyecto comercial tin riba nos pais, cu pa mayoria no ta pa e poblacion local.

E publicacion ta bisa cu, “A bin un campo di tension entre e economia liber cu a scoge y e asina yama ‘carrying capacity’ (capacidad di carga) di Aruba. A traves di añanan a bira cla cu e impacto negativo social di e proyectonan no ta ser compensa di manera cu ta sinti directamente y suficiente. Pa compensa esaki te cierto altura ta maneho permanente na Aruba cu desaroyadornan di proyecto cu ta haya un parcela di erfpacht otorga pa desaroya un proyecto comercial, ta pasa un suma cu ta un promilahe di e inversion,stipula pa ministro encarga cu Desaroyo Teritorial, Infrastructura y Medio Ambiente, pa un institucion caritativo. Na e momento e promilahe ta 7,5 promil di e inversion total di e proyecto.”

Prome cu entrada di e actual ministro encarga cu Desaroyo Teritorial, Infrastructura y Medio Ambiente, tabata e ministro di turno cu tabata dicidi cual lo ta e beneficiario di e suma, cu facilmente ta core den miles o diesmiles di florin. Sin embargo, talvez tambe mirando e otro problemanan di mal administracion cu el a bin topa den e ministerio aki, a opta pa crea un comision cu ta encarga cu ricibi e peticionnan, evalua nan y finalmente otorga e donacion na un organismo cu ta cumpli cu e rekisitonan estableci. Di e manera aki e mandatario a pone e trabao aki na cierto di distancia di su propio toma di decision, loke riba su mes ta mustra un accion responsable, cu miras pa bon gobernacion.

Den e Comision di Coordinacion (Coördinatie Commissie Maatschappelijke Bijdrage), institui pa Disposicion Ministerial (MinROIM 4398/18) ta tuma asiento dos representante di e ministerio encarga cu Medio Ambiente, y un representante di resp. Ministerio di Cultura, deporte, Innovacion, Direccion di Infrastructura y Planificacion (DIP), y un di Direccion pa Naturalesa y Medio Ambiente (DNM).

E comision tin como tarea: desaroya y implementa un plan di maneho; desaroya un reglamento pa e manera di traha di e comision; eherce supervision y control pa e uso adecua di e fondonan poni na disposicion di e organisacionnan caritativo, como tambe cumplimento cu e condicionnan stipula. Tambe prepara relato anual y entrega esakinan pa nan aprobacion na e ministerio, conseho di ministro y seguidamente parlamento.

Ki tipo di organisacion por haya subsidio di e manera aki?

Organisacionnan den e siguiente areanan:

  • Naturalesa/Conservacion di medio ambiente;
  • Meta innovativo;
  • Meta cultural;
  • Meta deportivo.

Condicion ta cu e institucion tin personeria huridico, no tin meta di ganashi, ta registra na Camara di Comercio y por entrega su cuenta anual/relato financiero di e aña anterior. Tambe e institucion mester por entrega un declaracion di Departamento di Impuesto tocante su comportamento pa cu impuesto, si e no tin exoneracion a base di ley di declara impuesto.

E suma maximo di donacion ta Afl. 25.000,- pero e documento ta menciona cu si mester surpasa e suma aki, anto esey ta bira “facultad discrecional di e Ministro encarga cu Desaroyo Teritorial, Infrastructura y Medio Ambiente, riba conseho di e Comision.”

E proceso di implementacion ta haya su conclusion cu debido raportahe financiero, segun normanan stipula p Centrale Accountantsdienst y un control final di e Comision. Finalmente e Comision ta duna cuenta na e ministronan concerni, primeramente esun encarga cu Desaroyo Teritorial, Infrastructura y Medio Ambiente, pero tambe e otronan representa den e Comision.

Base legal

Ta di aprecia cu e mandatario a tuma e molester pa clarifica y structura un asunto cu anteriormente tabata tuma lugar den total discrecion, pa no bisa scuridad, di e despacho di e ministro(nan) encarga cu emision di tereno publico den pasado.

E problema cu no a resolve, sin embargo, ta cu e gesto di bon voluntad aki cu ta exigi di e desaroyador cu ta haya tereno erfpacht, no tin ningun base legal. E Landsverordening Uitgifte Eigendommen (AB 1989 no. GT 21) na ningun momento o lugar ta duna e ministro encarga e potestad pa pone como condicion cu e compania desaroyador mester haci un donacion pa por haya un tereno pa desaroya su proyecto.

Ademas, e stipulacion cu ora ta trata di suma grandi, e poder di decision ta bolbe cerca e ministro, ta habri porta atrobe pa otorgamento segun e deseo di e mandatario. Di e manera aki no ta logra kita e ‘stigma’ cu e trayecto aki tin cu e por sirbi pa di e manera aki un mandatario ta dicidi di beneficia un persona, natural o legal, di placa publico cu ta ser obteni sin base legal. Den consulta legal cu Bon Dia Aruba a busca den e caso aki, ta mira tampoco con e asunto aki por keda regla, si e ley cu a regula emision di tereno no ta contempla e imposicion di e tipo di gesto aki.

Tambe e areglo actual ta crea henter un administracion financiero y organisatorio, na un momento cu gobierno mester ta buscando, segun nan propio maneho, con ta baha gasto di operacion di e aparato publico. Loke riba su mes ta parce un bon iniciativa, finalmente no ta mustra asina bon, pasobra e base inicial legal no t’ey.