(NLTimes) – Un aplicacion special pronto lo ta disponibel pa proteha hende for di ta exponi na imagennan di abuso sexual di menornan. E aplicacion actualmente ta den desaroyo y lo test esaki cu personanan di varios pais cuminsando e proximo temporada, segun Expertisebureau Online Kindermisbruik tambe conoci como EOKM a reporta.
“E aplicacion ta monitor ambos trafico di rednan y imagennan cu ta ser mira riba e usuarionan su pantaya,” EOKM a bisa. “E aplicacion ta traha den e background di e dispositivo, pa asina e usuarionan no por ripara esaki al menos cu un imagen di abuso sexual di menor ta ser mira.” E imagennan aki eora lo ser blokia.
Ya caba tin varios ehempel di ‘porn blockers’, sinembargo te ainda nan no ta traha optimal contra imagen di muchanan. Por ehempel, un tata cu ta tuma potret inocente di su yiu ora e ta bañando posiblemente ya lo ser blokia como un resultado di esaki.
EOKM ta premira cu lo haya suficiente persona pa test, pa motibo cu ciertamente tin hende cu kier proteha nan mes di e tendencia aki, segun un empleado Eline d’Ailly. Arda Gerkens, director general di Stop It Now, parti di EOKM, tambe ta di acuerdo bisando cu “personanan cu ta contacta nos centro hopi biaha ta busca hermentnan tecnico pa yuda nan mantene nan mes leu for di e material aki.”
“Ademas, e aplicacion ta preveni cu e victimanan di abuso sexual ta bolbe experiencia e trauma via e imagennan cu nan ta mira cada biaha riba internet,” EOKM a splica. Segun nan, e proyecto ta lidera pa Charite Hospital na Berlin y ta funda pa e Comision Europeo cu un fondo disponibel di mas o menos 2 miyon euro.
