Minister di salubridad Dangui Oduber (MEP) a anuncia cu ‘si tur cos ta bon’ otro siman nan lo ta lansando e aplicacion pa colecta feedback di pashentnan riba calidad di cuido ofreci pa dokternan di cas y nan assistentnan.
E app cu e mandatario a anuncia 3 luna pasa actualmente ta den su ultimo fase y lo ta terminando esaki pa anuncia otro siman oficialmente. Minister a subraya cu e herment aki no ta un medio pa parti straf pa dokternan di cas si no cu esaki lo ta enfoca riba mehora calidad di cuido den practica di dokternan.
Mientrastanto segun sr. Oduber a tuma den consideracion e feedback cu a drenta pa loke ta trata e uzo di e aplicacion aki bou nos grandinan, cual lo conduci na crea alabes un website y formularionan cu por yena pa asina evalua calidad di cuido. “Di e manera aki tur e dokternan di cas lo haya un miho evaluacion pa e calidad di cuido cu nan ta brinda na comunidad.”
Un di e aspectonan di e aplicacion aki lo ta segun e mandatario cu lo por evalua e calidad di servicio di no solamente e dokter di cas si no cu tambe lo por bay evalua di e assistent di dokter. “Asina bo ta evita cu e dokter di cas su practica ta haya mal nomber pasobra porta e dokter di cas ta duna bon servicio y e recepcionista no ta duna e servicio manera cu mester ta.”
