Recientemente e ciudadano Jairo Boekhoudt, kende ta doño di su mesun compania di investigacion y mercadeo, a presenta e aplicacion digital Preveni Aruba.
Esaki a wordo presenta durante e anochi cu minister Arthur Dowers di Husticia a presenta e plan di maneho nobo.
E aplicacion ta den proceso di construccion y prueba ainda, pero na momento cu e ta cla, e lo brinda comunidad por comparti informacion cu Cuerpo Policial na forma anonimo of no anonimo. Esaki por tuma luga sea por medio di potret, video of texto.
Banda di esaki e lo brinda e posibilidad di live chat, caminda cu ciudadanonan por ta den contacto cu agentenan policial 24 ora pa dia, 7 dia pa siman. Na nan turno e agentenan ta encarga pa ricibi y filtra e informacion.
Encuesta
Motivacion tras di e aplicacion aki tabata e resultado di un investigacion, for di cual a conclui cu entre otro 7 di cada 10 persona na Aruba ta sinti nan mes insigur. Tambe a conclui cu apenas 2 di e mesun 10 personanan ey, tabatin un experiencia directo cu criminalidad. A descubri cu e origen di e sintimento di insiguridad ta bin debi na varios factor, incluyendo riba social media, caminda ta ricibi y comparti informacion sin verifica prome.
