Cuater luna pasa, sr. Arturo “Tuyo” Werleman a baha como director di Fundacion Pa Persona cu un Limitacion Intelectual Aruba (SVGA) y te ainda directiva di e fundacion aki no por a yena e vacatura aki. Esaki apesar cu tin candidatonan local capacita pa asumi e responsabilidad aki.
Sr. Werleman kende a fungi durante 28 aña como director di SVGA ta mira e situacion aki cu suma preocupacion. E ta reconoce cu su decision pa no sigui como director di e fundacion aki no tabata facil pe. Pero loke a haci e proceso mas facil tabata cu e tabatin cierto coleganan cu a studia na Hulanda, den mesun institucion cu el a bay studia, cu ta den condicion di tuma e trabou aki over. Sinembargo e ta lamenta cu e directiva di SVGA a kies un oficina Hulandes caminda nan a yega di entrevista 18 Arubiano pero pa nan niun ta bon.
Sr. Werleman kier pa e trabou y rumbo cu el a dune caminda e persona special ta na prome luga, lo por sigui cana ya cu a duna resultado satisfactorio. E ta haya cu solamente un hende local y nos akinan lo ta ideal pa bira director nobo di SVGA, ya cu nos mentalidad ta otro cu e Europeo pa compronde e lasonan familiar.
“Mayoria di biaha ma traha ariba e lasonan ey. Ma traha cu e base di nos cultura… Nos ta totalmente otro”, el a laga sa.
E tin duel cu varios luna a pasa caba y ainda directiva di SVGA no por a haya un reemplasante pa e vacatura cu el a laga atras. E ta totalmente convenci cu tin hendenan local cualifica pa e funcion aki. El a conoce basta colega cu a traha den otro fundacion tambe cu profesionalmente ta prepara pa asumi un funcion asina.
P’esey e ta pidi na e mayornan di e clientenan y tur esnan cu tin interes den e fundacion pa sigui vigila kico ta bay sosode. E no kier pa e fundacion aki cay ni tampoco perhudica pasobra actualmente no tin un director of un cabes visibel cu ta guiando e fundacion. Actualmente e directiva ta esun cu ta guiando e fundacion pero nan no ta hendenan profesional riba e tereno aki.
“Mi kier bisa nan pa keda atento wak kico ta pasando y bringa pa interes di bo yiu”, el a bisa. Tambe pa e mayornan di e clientenan no acepta cu cualkier cos ta wordo haci cu e fundacion y evita cu e cuido cu a yega na un nivel hopi halto lo cay. “Esaki ta un di mi miedo mas grandi cu mi tin”, segun sr. Werleman.
