Diaranson atardi, ITF conhuntamente cu Beach Tennis Aruba a haci e apertura oficial di e ITF Panamerican Championship como tambe e torneo cu tur hende ta warda riba dje tur aña, esta ITF Aruba Beach Tennis Open. Cu presencia di 10 pais, un total di mas cu 75 hungado, tabata presente.

E anochi a habri cu un rueda di prensa, caminda representante di Beach Tennis Aruba, Sr. Sjoerd de Vries, a yama Bon Bini na tur presente, como tambe na tur participante, kende nan ta super bon prepara pa duna bataya. Tambe a hiba palabra, e refree principal pa ITF, Massimo Morelli. E representante di ATA, cu tur aña no ta duda den contribui cu e evento aki, Sra. Tita Iglesias, a duna un bon bini y duna su palabra di exito a cada un deportista presente. Tita a sigura cu tur hende por a compronde kico e la bisa, ya cu e la duna su discurso den Spaño y Ingles. Na mesa tambe nos tabata tin representante di Tennis Bond Aruba, Sr. Ivan Ng. Un persona hopi conoci den e deporte di tennis.

Pa termina e rueda di prensa a hiba palabra 2 hungado, cual ya a bira un custumber cu cada aña BTA ta kies un hungado femenino y uno masculino, cu den e ultimo temponan aki ta den ‘spotlight’ positivo den e deporte di Beach Tennis. Femenino a toca turno na Raffaella Miller, di Brazil, kende ta actual number 1 di mundo y pa e parti masculino, nos propio Aksel Sarmardzic a hiba palabra. Aksel den e ultimo lunanan a bin ta eleva su nivel di wega, cu a hib’e na gana varios torneo nan grandi den exterior. Aksel actualmente ta number 12 di mundo.

Despues a sigui pa desfile oficial, cu presencia di Venezuela, Brazil, Chile, Argentina, Ecuador, Uruguay, Corsou, Puerto Rico, USA, y Aruba. Un atmosfera increibel, cu presencia di bastante siguido di e deporte di Beach Tennis, cu unicamente a sigura, cu e aña aki un biaha mas, nan por spera hopi ambiente.

E prome weganan lo cuminsa diahuebs mainta pa 9or y atardi lo cuminsa bek desde 5or te den anochi. Diabierna mainta 9or e weganan lo continua y lo cuminsa bek den atardi pa 4or na Bushiri Beach Arena. E semifinal nan lo tuma lugar diasabra pa 10or y pa 4or lo cuminsa e final. Ta bon pa pone enfasis cu e weganan di diahuebs y diabierna mainta ta na Tropicana Beach Club y entrante diabierna atardi esakinan ta tuma luga na Bushiri Beach Arena.