Ayera nochi a tuma luga e gran apertura oficial di Weganan Escolar 2023, un proyecto presenta pa Gabinete Wever-Croes II, bao liderazgo di Minister di Deporte y Enseñansa, Endy Croes hunto cu IBISA. Despues di algun aña cu Weganan Escolar no a tuma luga, e aña aki e alumnonan di diferente scol di Aruba ta competi den diferente deporte pa diferente premio pa tanto e alumnonan como e scolnan tambe.

E apertura a cuminsa cu e desfile oficial. Grupo di Scouting Ora Ubao a compaña e entrada di bandera di Aruba y despues a sigui diferente grupo multicultural, cu a presenta trahenan tipico di nan pais, bao guia di John Freddy Montoya.

Despues a toca turno na e protagonistanan di e Weganan Escolar, e streanan di e diferente scolnan cu ta participante den e WE Aruba 2023. Un total di 45 scol y mas di 1000 mucha ta competiendo den e diferente disciplina di deporte.

Despues di e desfile oficial a tuma luga e presentacion di baile di grupo di baile NLG y NTG, bao guia di Marisol Peña, hunto cu atletanan di Gihae Gymnastics cu a haci un bunita presentacion pa asina duna inicio na e gran evento escolar.

Prome Minister di Aruba, Evelyn Wever-Croes durante e parti protocolario a duna su discurso den cual el a enfatisa e gran honor y placer di por a presencia e gran apertura di WE Aruba 2023, cu a despues di varios aña ta un realidad atrobe.

“Awe hunto cu tur e ekipo, tur e maestronan y tur e scolnan nos ta cumpliendo cu nos muchanan. Den nomber di Gobierno di Aruba mi kier gradici cada un di boso cu ta haci esaki posibel,” el a indica.

Prome Minister a remarca cu cada biaha cu e hiba un discurso y e menciona cu Aruba ta den recuperacion pasobra economia ta bay bon, turismo ta bay bon, finanzas ta bayendo miho, desempleo ta bahando, pero el a enfatisa cu e progreso di un pais ta ser midi ora su muchanan ta progresa y muchanan ta progresa mas a traves di deporte.

El a subraya cu Gobierno di Aruba por haci apenas un parti di e trabao, pero ta danki na cada un di e mayor-, hoben-, docente-, gobernante-, parlamentario- y e lidernan den tur e diferente actividadnan deportivo, cu WE Aruba posibel. “Den nomber di Gobierno di Aruba mi kier gradici boso,” el a bisa.

Minister di Deporte y Enseñansa, Endy Croes, a expresa cu e meta di WE Aruba ta pa brinda e alumnonan y futuro atletanan tanto den kleuter, basis- y voortgezetonderwijs un plataforma moderno y innovativo pa competi sanamente den shete diferente disciplina y alabes tambe un baile cultural.

Un total di alrededor 4500 alumno di alrededor di 60 scol a competi durante mas di seis luna largo y aworaki esnan cu a clasifica ta alrededor di 1000 mucha y 45 scol cu lo ta competiendo durante e siguiente dos siman pa e premionan maximo.

“Un palabra di pabien y palabra di danki na tur e scolnan, tur docente-, cabesante- y lidernan deportivo cu a haci esaki posibel. No ta minister, no ta gobierno, pero ta hunto nos ta logra esaki.,” Minister Croes a enfatisa.

El a remarca e importancia di deporte cu ta un vehiculo cu ta forma un miho persona pa comunidad, tanto fisicamente, mentalmente y alabes social. El a enfatisa cu deporte ta fomenta entre otro e disciplina, caracter, amor pa prohimo, amor pa patria, respet, amistad, excelencia, curashi y inspiracion, cual ta balornan fundamental pa formacion di henter un sociedad. “Deporte ta crusa tur frontera pa unifica henter un nacion,” el a resalta.

Por ultimo Prome Minister, presidente di Parlamento di Aruba, Edgar Vrolijk y Minister Croes a scop e prome bala pa asina habri oficialmente WE Aruba 2023 y duna inicio na e prome wega di futbol cu a tuma luga ayera nochi.