Ayera mainta a tuma luga e apertura di e VIII Sustainable Education Symposium (SES) den man di su coordinador, Ronny Alders na servicio di Biblioteca Nacional Aruba (BNA) y cu sosten y ayudo di departamento di Agricultura, Cria y Pesca (Santa Rosa).

E apertura aki a conta cu presencia di minister di Enseñansa, Rudy Lampe y parlamentario Ricardo Croes (RED) y invitadonan di e sector di enseñansa y oradornan special, entre nan Nathalia Maduro, Henk van Dort (Hulanda), Ingela Laclé y Gregory Fung-A-Fat. Tambe e artista, William Michael Guerrero di Colombia, kende hunto cu su casa, Ana Rosa Londoño, ta duna un tayer di arte recicla. Pero principalmente nan a conta cu presencia di e studiantenan di Colegio San Nicolas cu a yena full e sala di Biblioteca Nacional Aruba.

Minister Lampe
Den su discurso di apertura, e mandatario Rudy Lampe a pone atencion riba e importancia di e tipo di simposio aki, pero principalmente e tema di ‘Hof’i Bario’ riba cual nan lo ta concentra te diabierna.

E mandatario a laga sa cu e tema di ‘Hof’i Bario’ ta liga na e concepto di ‘community garden’. Lampe a conta cu durante un biahe cu el a haci na New York, e por wak espacionan caminda e bisiñanan tabata planta y haya fruta y berdura. Nan tabata probecha espacionan practicamente perdi pa nan planta y produci.

El a bisa cu asunto di medicinanan alternativo tambe ta para den su cartera. P’esey den cuadro di e prome SES, nan a dedica na e tema di Remedi di Tera. Segun e mandatario, den e simposio ey nan a trata topico cu tabata taboo den nos comunidad, manera e uzo di cannabis medicinal como remedi di tera.

Igualmente, Parlamentario Ricardo Croes a conta riba su experiencia personal caminda el a crea su propio cunucu den su cura di cas. E tin mas cu 80 mata di fruta y berdura, uzando e awanan recicla y material biodegradabel pa mantene nan. P’esey el a afirma cu ‘desaroyo sostenibel ta depende di bo.’

Pero e ta haya cu un desaroyo sostenibel dificilmente por bin sin un educacion sostenibel duna pa hendenan cu tin e conocemento. P’esey el a elogia e participacion di Santa Rosa y otro participantenan den SES. E ta spera cu tur hende por realisa e importancia di e simposio aki. Dia 4 di september lo tin un anochi di lectura totalmente gratis na Cas di Cultura di 7pm te cu 9:30pm.

El a termina bisando cu Aruba ta depende di turismo, pero turismo no ta sostenibel, y nos no por depende di turismo. Pero si nos por depende di nos mes, considerando cu Aruba tin diferente fuente di energia limpi, manera energia solar, biento y lama cu nos por saca probecho y abastece di nan.

Director di BNA, Astrid Britten, a gradici e participacion y asistencia di e publico den cuadro di e apertura di e simposio aki, muy particularmente di e studiantenan di Colegio San Nicolas.