Apertura di Museo Industrial

Ayera nochi a tuma luga e apertura di “Museum of Industry” na San Nicolas (watertoren). Un satisfaccion sumamente grandi pa mira un vision y mision cu a nace na momento cu a dicidi pa cuminsa cu un restauracion na 2009/2010.

“4 aña pasa a pone e base y plataforma tur rond di Aruba,” segun Minister Otmar Oduber. Na 2012/2013 a tuma e decision a base di estudionan cu a wordo haci, di e importancia cu cultura tin pa bo turismo. “Mi a bisa hopi biaha, cu hopi aña cultura a yora pa atencion. Awo nos ta yora cultura pa atencion pa sostene e pilar economico di Pais Aruba y nos turismo,” el a enfatisa.

Esaki ta e apertura di e prome museo na San Nicolas, cu ta e museo industrial pero dentro di poco lo sigui cu e di dos museo cu ta Nicolas Store. Esaki lo ta e cas pa e di dos museo aki na San Nicolas.  

Awo ta bay mustra cu por crea un industria cultural unda cu e cultura y herencia lo wordo transmiti pa nos propio hendenan pa nos recorda di unda nos ta bin, pero tambe pa e impacto den e economia di pais Aruba y area di San Nicolas. Un Cultural Heritage City, un atraccion nobo pa pais Aruba.