Durante un ceremonia riba tereno di Refineria di Aruba a tuma luga apertura di e lab y museo di cultivo di microalgae cu ta un proyecto piloto di Gobierno, TNO, Refineria di Aruba hunto cu Citgo.
Prensa independiente no tabata invita pa e evento aki. Locual a pasa varios biaha caba, entre otro durante e presentacion di e companianan cu ta inverti den e refineria. Bon Dia Aruba no ta haya un motibo dicon gobierno sea e otro partidonan envolvi no ta invita prensa.
E contenido den e articulo aki ta di dos relatonan cu gobierno a manda ayera nochi:
“Un di e principal stakeholdernan ta TNO, cu ta e instancia encarga pa haci e investigacionnan necesario pa recoge CO2 pa cultivo di e micro algae. E proyecto piloto aki Aruba Algae ta uno sostenibel, innovativo y comercial. Loke cu Aruba ta bay ta produciendo den e Lab lo pone e marca di Aruba den un mercado global di algae di 100 biyon dollar”, asina Ruurd Schoolderman (Strategic Advisor Energy di e Oficina Caribense TNO) a bisa den e relato di gobierno.
“E prome paso den e proyecto piloto aki, el a splica, ta cu mester a haci un investigacion cual ta e miho tipo di algae pa cultiva na Aruba. E miho a resulta e micro algae spirulina, cu no ta visibel pa bista humano, pero e ta perfecto pa crece den e clima di Aruba y cu ta haci cu e por wordo produci durante henter aña. E tipo di micro algae cu ta bay cultiva ta wordo usa den productonan di beyesa, den bebida y productonan di salud. E nomber cu a wordo duna ta Spirulina Arubensis”, segun e relato.
Sr. Schoolderman ta splica cu e microalgae ta wordo cultiva na California, pero solamente den e periodo di april pa october y na Hawaii e ta wordo cultiva henter aña pero no den temperatura optimal.
Den e prome fase cu ta andando a haya data pa e produccion di e Spirulina Arubensis. Den e siguiente 12 lunanan e proyecto mester optimalisa e proceso di cultivona Aruba. Inicialmente e produccion ta pa mercado local y despues den colaboracion cu companianan local y internacional ta cuminsa promove e productonan y finalmente mester yega na un proceso di produccion industrial, segun e relato.
