Dialuna mainta, Prome Minister Evelyn Wever-Croes a anuncia oficialmente durante un conferencia di prensa e reapertura di Help Bestuurskantoor (HBK) na San Nicolas. Despues di cera e edificio principal na october di aña pasa, HBK San Nicolas ta muda temporalmente pa edificio di RDA mientras ta remodela e edificio principal.
Manera ta conoci caba dia 31 di october, den un forma basta repentino, mester a cera e localidad anterior di HBK San Nicolas debi na cu e lugar a wordo afgekeurd y no tabata adecua mas ni pa esnan cu ta traha eynan ni tampoco pa ricibi e clientenan na HBK.
Wever-Croes a splica cu na e momento ey e unico alternativa tabata pa cera e luga y e empleadonan a bay traha na e edificio di HBK na Savaneta pa e ultimo dos luna y mey, mientras cu a cuminsa traha pa habri e localidad nobo.
“E ta un momento hopi particular pa nos ta para akinan awe na momento cu nos ta habri e localidad nobo di HBK San Nicolas. Awe e ta un realidad. Awe nos a ricibi e prome clientenan akinan caba y manera por mira nos ta den un establecimento mas nobo, mas moderno y cu ta cumpli cu tur norma y standardnan necesario,” el a remarca.
Prome Minister a enfatiza cu e proceso pa yega asina leu no tabata facil. El a splica cu e sistema di burocracia den Gobierno di Aruba no ta facil pa djis move un departamento di un dia pa otro, e ta algo cu ta tuma hopi tempo, pero den e caso aki nan tabata kier keda cla den dos luna y a logra a keda cla dos luna y mey.
El a tuma e oportunidad pa gradici tur persona y organisacionnan cu a yuda cu e preparacionna pa e edificio nobo y cu a yuda cu e mudansa tambe, pero specialmente e comunidad di San Nicolas.
“Mi kier gradici specialmente e comunidad di San Nicolas pasobra cera HBK pa dos luna y mey no tabata facil, e tabata un molester pa hopi cliente, nos ta consciente di esey. Nos a haci nos maximo esfuerso pa keda cla den e periodo cu nos a stipula,” el a comenta.
Prome Minister a indica cu aworaki nan a habri den e edificio nobo di RDA cu ta un edificio temporal pa HBK San Nicolas. E idea ta cu ta bay remodela e edificio di gobierno caminda HBK tabata anteriormente y e ora esaki ta completamente cla nan ta muda bay back eynan.
El a agrega cu unabes cu e edificio ta completamente remodela, e idea ta pa no solamente e oficina di HBK San Nicolas ta eyden, pero apart lo tin mas departamento tambe. Segun el a indica, nan a pensa entre otro pa por ehempel Sociale Zaken, Dimas, nan ta purbando cu AZV tambe y otro actividadnan manera Enseñansa pa Empleo y San Nicolas Business Association tin espacio den e edificio aki y esaki tambe ta habri espacio pa otro tipo di desaroyo eynan.
Wever-Croes a señala cu ainda no a cuminsa cu e proceso di remodelacion di e edificio original di HBK San Nicolas pa motibo cu a bin un retraso den e plannan. E ultimo plan cu a wordo presenta, segun el a sigui splica, debi na e gastonan envolvi no por a continua. Esey ta e plan cu ta pasa e trabou over na SOGA y SOGA na su turno ta desaroya e MFA
E consehonan pa e plan aki a sali negativo pasobra SOGA ta aumenta e prijs e ora di tur e cinco oficinanan di MFA existente caba demasiado hopi y esey ta pone un peso demasiado grandi ariba e presupuesto di gobierno.
El a indica cu aworaki DOW ta trahando riba un otro alternativa caminda cu gobierno mes ta pone fondo disponibel pa remodela e luga y e ora no mester paga huur “te den eternidad” manera cu nan ta paga actualmente cu e otro edificionan di MFA di SOGA.
Den e siguiente simannan e plannan aki ta wordo concretisa y na momento cu esaki keda cla lo presenta tambe kico e plannan nobo ta pa caba di remodela full e edificio.
Prome Minister a remarca cu nan ta considera e edificio original importante den desaroyo di San Nicolas y e ta kere cu gobierno mester mustra kico e ta haci tambe y no solamente bisa cu nan kier mira desaroyo den San Nicolas. “Mester mustra tambe y esey nos ta kere ta bay bira un catalisador pa e desaroyo di centro di San Nicolas tambe.”
Apart di esaki, Wever-Croes a agrega, nan ta trahando riba otro tipo di desaroyonan tambe. El a splica cu caya principal di San Nicolas mester haya su atencion y DOW ta trahando riba esey tambe.
Na banda di esaki nan ta trahando riba un monumento cu lo bin na Sero Colorado cu ta un monumento di e Segundo Guera Mundial pasobra Aruba a hunga un papel hopi importante den e Segundo Guera Mundial door cu na cierto momento Aruba tabatin e unico refineria cu tabata duna fuel na e avionnan di e aliadonan den e guera ey. Gobierno kier probecha esaki, construi un monumento na Sero Colorado cu ta bay atrae turistanan.
“Ya caba nos a papia cu e operadornan di tour, nan ta kere den esaki y cu esaki bo ta bay haya otro tipo di fluho di bishitante pariba cu nos ta kere cu lo trece e desaroyo cu nos kier,” el a finalisa.
