Santa Rosa a habri un hardin botanico unda por haya diferente tipo di matanan cu ta conoci pa nos, cual ta forma parti tambe di e cultura di Aruba.
Esaki minister Chris Romero (MEP) ta informa den un relato. E ta papia di Aruba ‘su prome hardin botanico cu lo fungi como instrumento importante pa nos sector primario, pero tambe lo aporta grandemente na nos enseñansa y nos economia’.
“E prome stap lo ta pa unifica un grupo di experto cu lo tin como tarea principal planificacion y structuracion di e hardin botanico, cual lo tin beneficionan den diferente aspecto pa cu nos pais”, e ta bisa.
Beneficionan
Minister Chris Romero su intencion pa e hardin ta pa crea ‘un structura cu ta brinda un variedad grandi y extensivo di diferente matanan herbal, unda cu e bishitantenan por aprecia y siña e beneficio di cada un di nan’. Lo bay haci esaki den forma di un tour educativo y interactivo pa asina haci e bishita di cada persona uno placentero, e ta informa.
“Como un centro di estudio, Santa Rosa lo tin e oportunidad tambe pa sigui haci estudio riba e conservacion di nos matanan y asina tin un bista mas amplio di cada planta y su uzo. Esaki lo ta beneficioso pa nos comunidad, cu sigur lo bay saca un probecho enorme den e aspecto di salud.”
APP y bar code
E minister ta anuncia tambe: “Un aspecto sumamente interesante, specialmente pa e hobennan y tambe turistanan, ta un sistema di identificacion digital den cada mata presente na e hardin botanico, mediante un app y un sistema di bar code. E bishitantenan lo por download e app y na momento cu nan ta pasando cerca di e matanan lo por registra tur informacion riba nan smartphone of tablet. E aspecto innovativo aki lo aporta pa crea mas interes den plantamento y conservacion di nos naturalesa.”
