ORANJESTAD – Despues cu pa motibonan imprevisto e exposicion anual di Archivo Nacional Aruba no a tuma luga dia 18 di maart ultimo, Archivo Nacional Aruba riba “Dia di Rey”, 27 di april, ta cla pa presenta su exposicion pa aña 2019.
Archivo Nacional Aruba kier a invita henter e comunidad di Aruba pa e apertura di su exposicion titula “Presencia y Influencia di Clero Hulandes na Aruba”. E exposicion ta trata e periodo di Clero Hulandes unda cu por medio di e coleccion sumamente bunita y unico di documentonan y particularmente potretnan di Aruba den e añanan 40 pa 70 di siglo pasa. Traves di e exposicion aki lo mustra riba e influencia Hulandes riba e diferente aspectonan di desaroyo, e relacion y influencia di e Clero cu a biba y traha na Aruba, pa loke ta trata nos enseñanza, desaroyo social cultural, organisatorio, cuido di salud y deportivo. E exposicion lo ta basa particularmente rond di un coleccion di potretnan di e.o. Frere Theodorus Dubois, Frere Edgar, Almoezenir/ Kapelaan Delnoij, Soeur Philotea, UNOCA y demas materialnan propio y cu nos a ricibi for di otro instancia of personanan.
Aki nos por pensa riba e contribucion den lantamento di diferente organisacion sea di cuido, pero tambe como desaroyo di comunidad, manera hospital, scolnan, Imeldahof, Wit Gele Kruis, Ambiente Felis, Bibito Pin, de Trupialen, Estrella Voetbal Club, Don Bosco Club etc. etc.
E exposicion ta habri pa 10.00am y lo keda habri full dia, pa asina e gran publico por bin y mira e bunita exposicion aki. Banda di e exposicion lo tin tambe riba e parkeo di ANA lo un actividad cultural y festivo, cu weganan popular, festivo organisa pa Fundacion Amigonan di Archivo, cu ta duna un aporte na realisacion di e exposicion. E actividad lo ta di 10.00 am. pa 6.00 pm.
Archivo Nacional ta spera di por conta cu bishita di nos comunidad y alabes ta desea tur hende un feliz “Dia di Rey”.
