Un evento cu pa di 12 aña consecutivo ta wordo organisa den cuadro di Dia di Prensa, ta e exposicion di potretnan: E Lens di Mi Wowonan.
E exposicion aki, coordina pa e fotografo Leo Vrolijk y cu un biaha mas a conta cu RBC Bank como sponsor principal, a keda habri diadomingo ultimo dia 1 di september. E Lens di Mi Wowonan ta honra e trabou fotografico di 15 miembronan di prensa y dos fotografo invita.
E biaha aki e exposicion a wordo dedica specialmente na abogado Anthony Carlo, kende prome cu el a bay studia Derecho tabata un fotografo activo den mundo di prensa local. Aunke e no ta traha mas den prensa, ainda sacamento di potret ta sigui ta su hobby.
E di dos persona cu e exposicion aki a wordo dedica specialmente na dje ta e fotografo Seever Krozendijk, kende pa añanan largo ta inmortalisa cu su camara eventonan deportivo local di tur caliber; y tambe internacional den diferente disciplina deportivo cu Aruba a yega di participa den scenarionan, manera Olimpiada y Weganan Panamericano.
E veterano fotografo Vrolijk a elogia e interes di e miembronan di prensa pa participa den e exposicion aki. Mas cu 200 potret digital el a ricibi, locual ta un cifra hopi satisfactorio. E aña aki a wordo institui e premio na e feliz memoria di e fotografo di prensa, Djiespie Franken, kende a bay laga nos na final di aña pasa. E premio aki a wordo otorga na e hoben Brian Koolman, kende ta forma parti di e generacion nobo den prensa, como un estimulo pa sigui den e noble, pero masha sacrifica trabou aki.
Director di RBC Bank, Pierre Rafini, a felicita e fotografo Leo Vrolijk pa su empeño durante e ultimo 12 añanan cu el a bin cu e iniciativa pa organisa e exposicion aki. Igualmente Rafini a bisa cu durante e di 12 aña aki, RBC Bank ta para tras di e proyecto aki. “Esaki ta nos manera di contribui na prensa y na e bon y bunita trabou cu nan ta haci,” el a bisa.
