Ayera nochi a tuma e ceremonia di apertura riba red carpet di e 28 version di e Festival di Buki pa Mucha (FBM) 2020 na Biblioteca Nacional Aruba (BNA) su sede di Oranjestad. E aña aki e tema di e festival ta historia y su slogan: “Tempo di mi tempo…” El a conta cu presencia directora di BNA, Astrid Britten, kende a duna e discurso di apertura.

Coordinador di FBM, Yosmar Sneek a declara na Bon Dia Aruba cu e biaha aki e apertura a tuma luga den un forma full diferente ya cu e tabata digital. Mescos cu henter e festival di buki aki cu ta uno totalmente digital. E produccion aki tabata posibel danki na e departamento di Media di BNA cu a bin cu cambio y cu a eleva BNA su plataforma digital den e tempo di pandemia aki.

“E forma con e proceso aki a tuma luga tabata un transformacion masha grandi mes,” el a bisa.

E biaha aki tur scol ta participa si nan kier, ya cu nan ta pone e presentacion di cada autor disponibel via YouTube. Sneek ta formula un invitacion pa henter comunidad ya cu e no mester ta den scol mes, sino cu nan por disfruta di cada presentacion den nucleo di famia via online.

Tambe cada dia di e festival di dialuna te diahuebs pa 3’or atardi tin un seccion live. E ta e unico manera cu e autor tin un presentacion fisico cerca un grupo limita di mucha invita ya sea na BNA di Playa of San Nicolas.

Tur esaki teniendo na cuenta e protocol di DVG. Esaki ta wordo transmiti tambe via Facebook page di Biblioteca Nacional Aruba. “Esaki ta un tiki e parti humano directo,” el a bisa. Aunke e festival ta full digital, BNA ta hopi consciente cu a pesar cu e contacto entre persona no t’ey, e ta haci falta.

Antes e aperturanan di FBM a wordo celebra pafo di BNA na Playa, y ultimo añanan na Cas di Cultura. E muchanan tabata bini y grupo di mucha di scol tabata haci nan show. Pero e aña aki esaki tampoco tabata posibel, ya cu no por tin aglomeracion, y logicamente e contenido tabata diferente tambe.

Autornan

E festival aki cu a cuminsa ayera y ta culmina dia 6 di november ta conta cu un grupo di 11 autor invita. Normalmente e autornan di afo tabata bin Aruba, pero e aña aki no tabata posibel, pero no imposibel pa nan participa den e festival aki cu ta promove amor pa lesamento cerca nos muchanan.

E biaha aki tin cinco autor di Aruba: Richard Dabian, Liliana Erasmus, Robert Reeberg, Benjamin Romero y Elvis Tromp. E autornan di afo ta como lo siguiente: Monica Clarinda di Bonaire. Mercee Doran y Alvin Inecia (Tio Ali) di Corsou. Evelien van Dort, Jeroen Hoogerwerf y Lizzy van Pelt di Hulanda.

Mirando cu e biaha aki e autornan no por bishita e diferente scol, e prome cos cu BNA a haci tabata cuminsa a haci invitacion algun luna prome, caminda nan a splica e autornan riba e situacion di salubridad publico debi na e pandemia, y nan a dicidi di graba e presentacion di cada un di nan.

El a gradici cada un di nan cu e biaha aki a haci’e gratuitamente. Di e forma aki y durante e siman di e festival e grabacion di cada auto ta wordo presenta via e canal di YouTube di Biblioteca Nacional. Cada dia nan ta divulga un of dos autor cuminsando dialuna awor. Asina cada scol ta bay haya e link y tambe e programa relaciona cu e presentacion di cada autor. Intencion ta cu nan ta transmiti nan parti di mainta pa asina e muchanan di scol pa medio di e diferente device digital, nan por disfruta di e presentacionnan.

Sneek a bisa cu e hecho cu e biaha aki ta bay digital e ta haci un diferencia grandi, ya cu antes mester parti e autornan pa purba di yega cerca e muchanan di 65 scolnan cu ta participa di e festival. Pero lamentablemente nan no por a bay tur. Pero e biaha aki nan por wak tur presentacion, ya cu unabes cu nan ta lansa e grabacion, e ta keda riba e plataforma di YouTube, y nan por wak nan any time.

Exposicion

 

Tambe den cuadro di FBM tin un exposicion den sala chikito di BNA na Playa, pero tambe na San Nicolas cu ta tumando luga pa publico. E ta habri caba cu ilustracionnan cu Elvis Tromp a haci pa e buki di regalo di e festival cu nan respectivo tas pa tur scol. E buki ta e mesun historia pero bilingual, esta Ora Ubao na Papiamento, y Shelpeneiland na Hulandes. E expo aki ta algo innovativo rond di e mesun tema central di historia, unda bo por saca un potret den e cueba virtual.

Sneek a relata cu e biaha aki e clausura di FBM lo ta diferente tambe. Nan tin e cantica di e festival bou e titulo: “E ta Lesa y bo lo wak” cu ta riba e website di BNA. Nan ta organisa un TinTok challenge, caminda e muchanan cu e cantica di e festival, nan por traha un TikTok y participa. Tin tres categoria: canta, baila y propio creatividad.

E muchanan cu ta participa den esaki, e dia di clausura di FBM, nan ta kere cu e TikTok challenge cu e resultado di dje. Pa cada categoria nan ta eligi un ganado y cada un di nan lo haya un premio cu lo wordo transmiti live for di estudio di biblioteca.

A pesar di e crisis di coronavirus cu tin su impacto den nos economia, FBM a bira un realidad, y Sneek den nomber di BNA ta gradici tur sponsor cu a haci un biaha mas posibel e evento aki.