ORANJESTAD – Ayera e prome congreso di e dialogo tripartite social laboral (D.T.S.L) a cuminsa, cu e firme proposito cu lo tin un bon entendimento entre gobierno, gremio comercial y gremio sindical.
E prome topico cu nan a trata tin di haber cu e proyecto di ley di Arbo (Verordening Arbeid Omstandigheden) bou e slogan di ‘Rumbo pa: Trabou, Digno cu Siguridad y Salud’. For di un inicio y mirando e topico aki, a wordo premira cu e lo bira un dia arduo di trabou den e conference room di La Cabana hotel.
Minister di labor, Glenbert Croes, kende a realisa e apertura oficial di e congreso aki, no a duna un discurso, mirando cu ya den pasado el a yega di papia durante instalacion y clausura di e trabou realisa pa e comision tecnico encarga cu e organisacion y structuracion di e D.T.S.L. “Ta momento pa nos bay, manera ta bisa, directo al grano,” el a bisa.
Apertura
Aunke e asistencia tabata uno amplio, por a sinti tambe e ausencia di algun delegadonan cu ta representa ya sea e dunado di trabou y/of sindicatonan. Minister Otmar Oduber den su condicion di prome minister interino -ya cu e prome mandatario Sra. Evelyn Wever-Croes no tabata presente- a realisa e apertura di e evento aki.
Oduber a felicita tur esunnan presente na nomber di gobierno di Aruba, expresando su palabra di exito y perseverancia . Tambe el a felicita su colega di labor, Glenbert Croes, pa duna e paso aki di un forma bon structura pa trata e ley di Arbo, net un dia despues cu a wordo celebra Dia Mundial di Siguridad y Salud Laboral. “Un responsabilidad cu no ta keda djis na dunado di trabou, of djis pa esunnan cu ta trata den cualkier empresa aki na Aruba…” el a bisa.
Oduber mes na aña 2013 -tempo cu e tabata minister di labor den gabinete anterior- a yega di traha riba e concepto di ley aki, cu ta data di hopi prome tambe. Esaki ta un forma –segun e mandatario- di por pone e bienestar di nos trahadonan dilanti, y cu e productividad y eficiencia cu e dunadonan di trabou ta busca, ta wordo refleha den e siguridad y salud di cada trahado na Aruba.
Den e acto aki, e linguista Ramon Todd-Dandaré a fungi como MC y moderador, caminda el a realisa e presentacion di e delegadonan di e dunadonan di trabou, trahadonan (sindicatonan y organisacionnan) y gobierno. Tambe durante e prome reunion aki a keda nombra y instala e raad van bestuur y delegadonan extraordinario di D.T.S.L.
