Den un conversacion cu Bon Dia Aruba a tene cu Dr. Maritza Ordoñez, medico consehero di Departamento di Salud Publico (DVG), el a anuncia cu centro di diagnostico di Covid-19 pa personanan sin status legal a wordo habri caba, pa asina esunnan cu ta presenta sintomanan por haci e prueba gratis y lihe.
Ordoñez a expresa cu desde cu Covid-19 a yega na Aruba, e casonan tabata mucho halto pa esaki por wordo poni na disponibilidad. Mirando cu aworaki e cantidad di caso ta bahando, DVG a dicidi di pone un centro di diagnostico pa personanan cu no tin un status legal riba nos isla.
Esaki ta ubica na districto di Oranjenstad na Caya Grandi, na unda tabata ubica e prome centro di diagnostico tempo cu e pandemia a cuminsa. E centro ta habri pa publico tur dialuna, diaranson y diabierna, for di 2or te cu 4or di atardi, pa esnan cu no tin acceso na AZV pa motibo cu no ta inscribi na Censo of no tin un dokter di cas.
Di esaki, Ordoñez a splica cu DVG kier tin control riba loke ta trata malesa Covid-19 y p’esey nan ta pidi pa comunidad cu no tin nan papel den regla y cu por presenta algun sintoma yega na centro di diagnostico aki, na unda por haci e prueba di Covid-19 gratis, sin cu mester haci afspraak, pero respetando e regla di distanciamento social y haciendo uso di tapa boca.
Igualmente el a afirma cu e personanan lo haya e resultado di biaha, den un tempo basta corto. Di e forma aki e persona por sali di e luga sabiendo e resultado di su prueba. Den caso cu e persona ta sali positivo, e persona lo haya informacion di personal di DVG na su idioma, pa asina por confirma cu e persona ta sinti mas comodo y cu mas confiansa cu e informacion cu e ta hayando.
“Pa asina nos por gui’e con ta bay ta e cumplimento di cuarentena y isolacion den e luga na unda e ta biba”, Ordoñez a manifesta.
Den caso cu e persona lo por bira hopi malo cu mester acudi na hospital, el a indica cu nan lo tin disponibel un number di telefon di Cruz Cora, 582.2219 y door di tuma contacto via e number aki por haya informacion di kico nan tin cu haci. Tambe tin disponibel 166, na unda den oranan di anochi lo por haya un dokter cu ta bay guia e persona en cuestion.
“Pa cualkier motibo cu por ta, personanan cu no tin nan documentonan regla, DVG no tin discriminacion cu nan pasobra nan ta ser humano y nos kier haci esaki pa controla e virus y minimisa e casonan positivo”, Ordoñez a menciona.
Den caso cu por existi casonan positivo entre e grupo aki, cu e persona tin cu no tin entrada fiho, el a expresa cu nan ta yuda e persona den e periodo cu mester ta den cuarentena of isolacion pa haya paketenan di cuminda.
Igualmente, el a conta cu por existi casonan di persona cu tin cu bay den hospitalisacion, pero door cu nan no tin seguro, segun Ordoñez a bisa, ora momento cu Covid-19 a yega na Aruba na luna di maart a wordo crea un Crisis Team na unda a pone tur esey riba mesa. “Ningun ser humano cu ta biba den e pais aki ta wordo desampara na momento cu te hasta e persona por haya un complicacion y por bay te cuido intensivo (ICU). Si e tin cu bay, e ta bay”.
Por trece dilanti pa ki motibo nan no tuma e decision aki hopi tempo pasa, ora Covid-19 a cuminsa. Di esaki, Ordoñez a bisa cu esaki tabata “pasobra nos kier ta sigur cu e grupo aki tin acceso pa yega y haci e prueba di un manera mas facil y lihe, ademas gratis”.
El a enfatisa cu DVG no tin ningun conexion cu Polis of Warda Nos Costa cu por presenta un temor pa personanan aki pa motibo di deportacion. “No tin miedo di esey, nos ta buscando pa tur hende cu ta biba na Aruba por tin salud”, el a sigura.
Door di reglanan internacional, Ordoñez a indica cu den DVG y Cruz Cora ta existi respet entre e espacio, cu na ningun momento Polis por presenta na e luga aki pa pidi documentonan y tampoco Warda Nos Costa, pa motibo cu eynan no por interumpi e maneho y trayectorio di un pais pa loke ta trata salubridad publico.
E Centro di diagnostico aki a cuminsa habri nan porta desde diaranson ultimo y di esaki Ordoñez a señala cu nan ta sigur cu den e prome dianan aki nan lo por haya pashentnan cu tin sintomanan relaciona cu Covid-19. Pero independientemente di e status residencial cu e personanan tin, e mensahe di protocolnan y maneho ta yegando na e poblacion.
“Si e grupo aki por sinti desampara pa no por yega na remarca pa un prueba mas facil, awe DVG ta brinda e oportunidad ey, specificamente pa e grupo di personanan aki”, el a declara.
Igualmente, Ordoñez a splica cu personanan mester presenta sintoma, si esey no ta e caso, e ora ey no ta relevante pa nan por haci e test.
