ASU (NW) (14).JPG
Ayera tardi a tuma luga e apertura di ASU Olimpiade 2016. Durante e desfile por a mira atletanan di diferente edad.
 
E atletanan tabata marcha y por a mira nan den nan uniform representando nan deporte. Na e apertura tabata presente minister Alex Schwengle, ex deportistanan, mayornan, amistadnan. 
 
Sr. Gerald Franca, president di Aruba Sport Unie (ASU) a hiba palabra. El a gradici tur esunnan cu a yuda pa realisa un biaha mas e ASU Olimpiade. “Na prome luga mi kier a trece dilanti cu semper nos ta bisa cu deporte ta algo recreativo, dinamico, den e formacion di e hobennan y tambe ta trece disciplina den nan formacion. Tambe nos ta bisa hopi biaha, e ta bira un bon ciudadano. Manera nos ta mira aki nan pa nos futuro dilanti nos, nos mester ta hopi contento pa mira tur e atletanan aki, kendenan dia di mañan lo bin maneha e pais aki,” Sr. Franca a bisa durante e apertura. Sr. Franca ta kere cu poco, poco e organisacionnan tin cu cuminsa traha hunto y den dia, y no separa.
 
Gerald Franca
E president di ASU a haci un peticion na tur federacion y asociacion pa ta mas uni. “Mi kier a gradici di curason Ministerio di Deporte, Lotto pa Deporte, medionan di comunicacion, pasobra sin nan no tin apoyo. Specialmente e mayornan, pasobra e mayornan ta esunnan cu ta hiba e yiunan pa haci deporte. Inculca deporte den bo yiu, mustr’e cu esaki ta un manera sano den su formacion.”
E ta kere cu a yega e momento pa tin mas apoyo den un ley cu ta proteha Lotto pa Deporte. Pasobra si mira e gastonan cu tur aña ta subi, loke ta deporte, nan mester proteccion y apoyo di gobierno y di parlamento. “Mi ta pidi pa sigui dilanti, pa sigui apoya deporte, sigui duna nos luz berde na dje, y cada un di nos, manera nan ta bisa di nos curason, cu deporte ta nos futuro.”
 
Minister di Deporte, Salud y Cuido di nos Grandinan
Minister Schwengle tambe a hiba palabra durante e apertura. El a gradici ASU pa organisa e olimpiada. “Cu basta honor mi ta para aki y mira tanto atleta asina. Segun mi esaki ta simplemente e tip riba e ijsberg.” Minister ta spera cu den futuro ful e veld lo por wordo yena cu mas atleta. E obhetivo cu gobierno tin ta pa di un forma of otro cu e mucha ta haci deporte, pasobra riba e isla tin un problema hopi grandi, segun minister. Tin problema grandi di obesidad. Tin problema grandi di salud. “No tin miho vehiculo, miho tool cu por wordo uza cu ta deporte.” E ministerio di deporte tin algun reto na caminda, entre otro pa organisa deporte miho. E placa cu tin pa wordo maneha mas miho cu ta posibel pa asina esaki no bay perdi. “Tin e reto grandi ainda pa bay busca mas placa pa deporte. Pero si mi busca mas placa pa deporte y e no ta bon maneha, ta placa tira afo. Mi por garantisa boso cu lo bay tin un poco mas cen pa deporte, pero alabes lo ay exigi un tiki mas tambe. Na januari Comision Subsidio lo bay over na bira den un Stichting Sport Aruba. Nos lo bay duna un tiki mas, pero tambe nos ta bay exigi un tiki mas y alabes nos ta bay facilita tambe,” e mandatario a indica. E sa cu tin federacionnan cu tin dificultad pero cu e ministerio ta dispuesto pa yuda y duna curso pa yuda nan con pa trata cu e parti financiero. “Kere mi e parti di deporte ta keda pa e federacionnan, pasobra nan sa di deporte. Nan ta maneha deporte. Y tarea grandi pa Gerald Franca y full directiva di ASU cu hunto cu COA pa duna sosten na federacionnan pa asina cada federacion por sigui crece. Tambe duna espacio pa cada mucha un espacio pa haci deporte.” Minister Schwengle a desea cada deportista un competencia sano y keda hopi sportief. 
 
Sra. Jacqueline van Putten tabata encarga pa e coordinacion. E tabata percura hunto cu mas miembro di ASU cu tur cos tabata bay bon durante e apertura. Tanto e bandera di Aruba como di ASU a wordo hisa, mientras cu e himno a wordo canta pa Jonathan Croes. Despues cu Jonathan a canta e himno, a cende e vlam di olimpiada. Esaki a wordo cendi pe capitan di RCA esta Aparicio, mientras cu Sr. Franca y minister Schwengle a indica cu e olimpiada a inicia.