No tin un desfile mañan durante e apertura di e Aña Parlamentario, asina presidente di parlamento Mervin Wyatt Ras ta informa.
“E aña aki lo ta un tiki diferente, ya cu a manda militarnan St. Maarten pa duna asistencia”, e ta bisa. Pues no tin un desfile pasobra e militarnan ta yuda e pueblo eynan, manera conoci. Presidente di parlamento ta manda palabranan di forsa na e pueblo di St. Maarten. Aunke cu e militarnan no lo ta presente, e procedura normal lo continua, e ta sigura. Na e Aña Parlamentario lo tin presencia di dignatario y invitadonan, incluso ministernan tambe lo ta presente den e sala di parlamento.
Durante e reces di parlamento, a realisa diferente trabou pa mehora infrastructura di e edificio, a cambia tapijt y a traha riba e sistema di airco, e presidente tambe ta conta. E ta bisa cu e ta contento cu e trabounan y awor ta cla pa apertura di Aña Parlamentario nobo, unda cu Gobernador lo duna su discurso encuanto maneho pa futuro.
Diamars mainta e caminda lo ta cera pa por ricibi Gobernador. Ta pidi automobilistanan pa tene cuenta cu e cambio aki den trafico den centro di Oranjestad.
