Apenas mita di e poblacion Cubano ta ricibi servicio di awa di manera stabiel

(CiberCuba) – E ingeniero Alexi Acosta Cruz, vice presidente di OSDE Agua y Saneamento a confirma cu na Cuba solamente e mita di e poblacion ta ricibi e servicio aki di un manera stabiel y sigur.

Den declaracionnan realisa na Mesa Redonda diaranson ultimo, Acosta a splica cu na e pais tin 2.600 luga cu sistema di canalnan subteraneo, mas di 3.000 stacionnan di pomp awa y mas di 24 mil kilometer di red y di tubonan subteraneo cu ta beneficia mas di 8.8 miyon di persona.

Sinembargo, di e total aki solamente un 48% ta conta cu un sistema di suministro di indicadornan di calidad, accesibilidad y disponibilidad cu ta garantisa un servicio sigur.

“E resto di e poblacion ta ricibi e servicio a traves di otro modalidadnan, manera e suministro di awa den tubo. Nos ta trata di yega na e cantidad mas grandi di Cubanonan posible,” el a sigura.

E region oriental di e pais tin e problemanan mas grandi den loke ta e suministro di awa limpi. Den e centro di e ciudad tin dificultadnan den teritorionan cu hopi sero y na e ciudad di Santa Clara.

“E cantidad di persona afecta pa e falta di awa na Cuba ta alrededor di 500 mil, aunke hopi abao di loke a wordo reporta na otro momentonan di escasez di awa,” e funcionario a bisa.

Den e programa di television tambe a participa Jose Antonio Hernandez Alvaraez, presidente di OSDE Agua y Saneamento, ken ta sigura cu e empresa estatal ta impulsa tres programa di inversion principal: reposicion di ekiponan di pompmento, midimento y cambio di e matriz energetico.

E di tres ta fundamental memey di e crisis actual na Cuba, no solamente pasobra e ta contribui na e ahoro di combustible, pero tambe pasobra e ta permiti cu e ekiponan di pompmento ta funciona, cualnan ta wordo afecta continuamente pa e blackoutnan.

E suministro di awa na Cuba ta depende di electricidad. E mayoria di e sistemanan di pompmento ta funciona cu e energia ey y poco di nan tin respaldo di generatornan electrico.

Un blackout di energia ta retrasa e reestablecemento di e servicio di awa, sobretodo ora cu e sistemanan di suministro ta ubica mas di 30 km leu di e nucleonan di poblacion.

E director di e empresa a bisa cu e ta dunando prioridad na e compra di productonan kimico pa garantisa e purificacion di awa y cumpli cu e normanan di higiena y sanidad.

E ta sigura cu nan ta aumentando e reparacion di tuberianan y e suministro di awa a traves di trucknan di carga den areanan cu tin deficit.

Hernandez a reconoce cu e prijs di awa a aumenta shete biaha mas despues di e proceso di reorganisacion, pero el a keha cu e costo di electricidad a aumenta 16 biaha mas y esun di combustible 19 biaha mas, door di cual a aumenta e costo di awa.