(AP) — Kico ta haci humano unico? Cientificonan a tuma un stap mas pa resolve un misterio cu un herment nobo cu por permiti comparacionnan mas precies entre DNA di humano moderno y esun di nos ancestronan extinto.
Apenas 7% di nos genoma ta unicamente comparti cu otro humano y no comparti pa otro ancestronan, segun un estudio publica diabierna den e journal Science Advances. “Esey ta un porcentahe chikito”, segun Nathan Schaefer, un biologo computacional di Universidad di California y co-autor di e estudio. “E sorto di hallazgo aki ta pakico cientificonan ta descartando e pensamento cu humano ta asina diferente di Neandertal.”
E investigacion ta basa riba DNA extrai di restonan fossiel di Neandertal y Denisovan awo extinto bayendo back alrededor di 40mil pa 50mil aña atras, como tambe 279 hende moderno rond mundo.
Cientificonan ya sa cu hende moderno ta comparti algun DNA cu Neandertal, pero diferente hende ta comparti diferente parti di e genoma. Un meta di e investigacion nobo tabata pa identifica e genes cu ta exclusivo pa humano moderno.
Ta un problema estadistico dificil, y e investigadornan a ‘desaroya un herment valioso cu ta tene cuenta cu datonan faltando den e genoma antiguo”, segun John Hawks, paleoantropologo na Universidad di Wisconsin, Madison, kende no a participa den e investigacion.
E investigadornan tambe a haya cu un fraccion mas chikito di nos genoma – apenas 1.5% – ta tanto unico na nos especie y alabes comparti entre tur hende na bida awe. E pidanan aki di DNA por tin e pistanan mas importante riba kico ta distingui humanonan moderno. Segun co-autor di e estudio, biologo computacional Richard Green, e regionnan di e genoma ta altamente enrikeci pa genes cu tin di haci cu desaroyo neural y funcion cerebral.
Na 2010, Green a yuda produci e prome secuencia di un genoma Neandertal. Cuatro aña despues, geneticista Joshua Akey a co-skirbi un documento mustrando cu humano moderno ta carga algun resto di DNA Neandertal. Desde e tempo ey, cientificonan a sigui refina tecnicanan pa extrae y analisa material genetico di fossiel.
Sinembargo, Alan Templeton, geneticista di poblacion na Universidad Washington na St. Louis, a cuestiona e asuncion di e autornan cu cambionan den e genoma humano ta distribui aleatoriamente na luga di den ‘cluster’ rond di cierto ‘hot spot’ dentro di e genoma. E hallazgonan ta resalta ‘cu en realidad nos ta un especie hopi jong’, Akey a bisa. “No hopi tempo pasa nos a comparti e planeta cu otro linahe humano.”
