Apelsina y anasa exporta pa Aruba ta liber di Musca di Mediteraneo

 Asociacion di Citricultornan di Sonaguera (Acison), na Colon, Honduras, a expresa nan satisfaccion di por a habri e porta di exportacion di nan producto pa Aruba. Ta asina cu diasabra ultimo nan a manda e prome dos container di apelsina y anasa pa nos mercado y esun di Martinique. Den transcurso di e otro siman nan tin pensa di manda entre tres pa cuater container mas.

Acison a laga sa cu nan productonan exporta ta cumpli cu tur rekisitonan  “fitosanitario” kiermen nan ta liber di plaga y nan ta cumpli cu control di higiena pa e consumo humano. E control a wordo haci dor di Servicio Nacional di Sanidad Agropecuaria di Honduras (Senasa).

Sr. Rafael Salazar coordinador regional di Senasa na Colon a declara na Diario La Prensa di su pais cu e productonan agricola cu nan a exporta ta liber di Moscamed of “Musca di Mediteraneo”. El a declara na e medio menciona cu nan ta apoya e productornan di asociacion Acison haciendo inspeccion di nan cultivo pa asina garantisa cu tur control “fitosanitario” ta na ordo.

Musca di Mediteraneo

Musca di Mediteraneo ta un di e plaganan mas destructivo di mundo. E musca of plaga aki tin un gran capacidad pa reproduci su mes y nan ta capaz di destrui plantacionnan grandi di frutanan. 

Nan ta infecta e frutanan cu balor of sin balor comercial ora cu nan ta pone nan webonan den e frutanan madura di casca suave. Tin biaha e frutanan aki a wordo comercialisa y despues nan ta detecta larva y bichinan desaroya den dje. 

E preocupacion cu ta existi semper ta cu e larvanan lo por wordo transporta di un parti pa otro cu frutanan infecta y despues ta wordo desaroya como musca adulto y infecta otro productonan. 

E paisnan cu ta biba di e exportacion di e tipo di productonan aki manera Guatemala y Honduras a bin cu programanan pa eradicay controla e Musca di Mediteraneo den nan teritorio y evita cu e ta wordo plama den otro teritorionan.