SCHIPHOL – E polisnan DH01 y DH02 ta bisa cu nan ‘a trata cu bon consenshi y cu nan no a haci nada malo’ durante e demostracion fatal di Mitch Henriquez na 2015. E parientenan di e defunto no ta convenci y e emocionnan dialuna a subi halto durante e prome dia di apelacion cu e polisnan a entama contra nan castigo.

Na 2017 a condena e dos polisnan na un castigo di prizon condicional di seis luna pa maltrato cu morto como resultado di e Arubano Mitch Henriquez (42) na Zuiderpark na Den Haag.

E polisnan mes ta bisa cu emocionalmente nan ta sufri hopi bou di loke a pasa y cu nan tin problema pa rebiba loke cu a pasa. “Mentira so”, primo Alexandro Dijkhof ta bisa na nomber di e famia, despues di e sesion.

Maria Henriquez – mama di Mitch Henriquez – tampoco no ta convenci. “Atrobe nan ta keda bira di tur banda y gaña”, e ta bisa emociona. Dilanti camara ainda Maria no ke reacciona: Ta mucho pisa y mi no por ainda”, e ta bisa bou di yoramento. Diaranson tin oportunidad pa e parientenan di e defunto bisa algo, e mama ta contempla di haci uzo di esaki.

E polisnan ta bisa cu nan tin trauma
E dos polisnan cu no obstante un peticion di e parientenan di e defunto, ta keda anonimo bou di e nombernan DH01 y DH02, dialuna a bisa kico nan ta sinti. “”Den mi sintimento mi tin tres aña caba den un prizon y m ta haya cu ta teribel pa tur hende”polis DH01 ta bisa hues. Tur dos ta bisa cu nan ta sufri tambe di afectacion di stress posttraumatico (PTSS) pa motibo di e experencia.

Parientenan di e defunto ke castigo mas halto
Caminda e polisnan cu e apelacion ta spera cu lo kita nan castigo, e parientenan di e difunto ta spera riba un castigo mas halto. E parientenan mes no por apela pasobra nan no ta partido oficial.

Pa e apelacion den e caso Mitch Henriquez Corte ta tuma casi dos siman. Diaranson 3 di april e parientenan a haya derecho di papia. Esaki ta segun e fuente Retkaribense.

Ruman muhe Lila Henriquez: “Pakico apelacion”
E ruman muhe mayo Lila Henriquez, ta papia como prome. “Mi a duda largo tempo si mi kier a papia y si lo mi tabata por, e ta conta. “Mi salud a bay atras y ta tristo cu mi no ta reconoce mi mes mas” E tin hopi pregunta: “E polisnan a apela, pakico? Ata nan por traha ainda di VOG (Declaracion tocante conducta)?”

Mama Maria Henriquez: ‘Pakico OM no ta persigui mas severo?’
Mescos cu su yiu muhe mayo Maria Henriquez, mama di Mitch, a keda cu hopi pregunta. “Cada biaha mi ta puntra mi mes si tabatin mas cos cu a sosode den e bus. Pasobra si mi mira e estado cu mi yiu homber tabata aden, tur na sla i cu herida, mi ta cuminsa duda di berde mes si ta na e tereno di e festival so nan a batie.” Tambe Maria Henriquez ta puntra su mes ‘pakico OM no ta persigui e negligencia di e polisnan cu tur forsa di lei’.

Ruman muhe Germaine Henriquez: ‘Ken ta laga e polisnan sinti nan mes menasa?’
Germaine Henriquez, e ruman mas chikito di Mitch tambe ta haci uzo di su derecho di papia. E ultimo dianan aki varios biaha el a basha yoramento den corte y sali bay. E no por pensa riba pordon: ‘Pa mi parti nan cera nan y tira e yabi afo.’

Ex amiga Jennifer Petrocthi: ‘Nos yiunan tur tin trauma’
Finalmente e ex amiga y mama di e dos yiunan di Mitch, Jennifer Petrocthi, ta papia: E ta basha yoramento ora e papia tocante e impacto di morto di Mitch riba nan yiu homber (16), cu tin un handicap mental. “E tabatin 12 aña ora su tata a fayece y te dia di awe e ta den terapia pasobra e ta haci su mes daño y e tin miedo.”

Si ta na e parientenan di e defunto nan lo ke pa e caso cera lihe. E famia ta prefera di mira cu e castigo cu e polisnan lo haya keda mescos of bira mas halto. “Mester duna un señal cu asina no por”, abogado Gerald Roethof dialuna caba a bisa Ret Karibense.

Impacto di e declaracionnan di e parientenan
E abogado ta spera cu ‘corte lo tuma e declaracionnan di e parientenan tambe na consideracion den e apelacion ora realisa e impacto di e caso aki”.

E polisnan DH01 y DH02, cu ta sinta separa den un otro parti di corte ta bisa cu nan tin compasion cu e parientenan, pero mas cu esey nan no ke bisa. “E cos ta basta teribel caba pa nan”, un di e polisnan ta bisa.

Diaranson 19 di juni hues lo dicta sentencia.