Actualmente na Erasmus MC na Rotterdam, tin un pacient di Aruba ricibiendo tratamento pa leukemia. E tratamento ta rekeri un transplante di stamcel urgente. Te cu awor, no a logra localisa un match den e database mundial.
Locual cu ta complica e buskeda di un donante y ta hacie dificil ta nos composicion genetico y unico di Caribe, cu ta uno multi-etnico. Motibo ta cu no tin hopi donante den region inscribi den e database ainda. Akinan nos kier haci un diferencia!
Debi na e urgencia y scarsedad di donante, famia a lansa un campaña urgente y intensivo en buskeda di un donante cu por ta e match pa nan ser keri. Crucial ta pa haya mas hopi hende posibel pa registra pa e chance aumenta pa haya un donante cu ta match.
Awendia hopi enfermedad grave manera diferente malesanan entre otro, diferente forma di leukemia, Aplastische anemie, MDS, Thalassemie, Sikkelcelanemie, Myelofibrose, por wordo trata y cura via transplante di stamcells. Lastimamente, na es momento aki, ni na Aruba ni den Caribe, no tin infrastructura, ni programa pa registra donantenan specifico di e region pa e grupo di pacientnan unico aki.
E meta di e campaña ta pa concientisa comunidad di e necesidad importante pa tin un programa di donante pa Aruba y region di Caribe, no solamente pa e patient specifico en cuestion, pero pa otro futuro pacientnan di e region den necesidad di un transplante.
Nos ta acerca Aruba henter como tambe nos hermana islanan y persona cu procedencia Caribense biba na Hulanda y Merca, cu e meta pa considera bira un donante di stamcel pa asina nos di Caribe tin mihor representacion den e stamcel Databank y asina bo lo por bira un heroe y salba un bida di un hende di Caribe cu tin mester di bo ayudo.
Si bo persona ta entre 18-60 aña y lo kier yuda scapa un bida, por fabor registra awe mes, pa wak si bo por ta un match. E test ta un simpel swab di boca. Si acaso un dia bo resulta di ta un match, e procedura den casi tur caso ta den forma periferal (via sanger) y no ta rekeri un procedura invasivo.
Nos ta hopi gradicido na *Caribbean Bone Marrow Registry* pa nan ayudo y sosten y pa provee nos cu e test kits. Nos a logra den corto tempo pa organisa un Donor Drive pronto na Aruba como cu pa e pacient en cuestion tempo ta crucial y di urgencia.
Tambe nos ta agradecido cu e reaccion y registracion ricibi te cu awo, pero ta importante pa mas hende registra pa bira donante pa posiblemente salba bida. Por whatsapp via celular +297 7381979. Nos lo contact bo persona pa mas informacion encuanto e proceso lo antes posibel.
Famia di e pacient kier a gradici comunidad completo pa e sosten den logra nos meta.
Sigi nos riba rednan social pa keda informa over di e desaroyo di e campaña riba: (LINK INSTA y FB) Registra awe y salba bida.
