Apelacion di Prome Minister Evelyn Wever-Croes: Tur iglesia di tur denominacion no tene servicio di misa ni actividad religioso

Ayera nochi, Prome Minister Evelyn Wever-Croes a bisa cu tur actividad publico cu tin di haber cu conglomeracion di hende ta keda cancela, entre nan celebracion di Santo Sacrificio di Misa. E mandatario a haci un apelacion pa entrante awe tur iglesia di tur denominacion na Aruba pa no tene servicio di misa ni actividad religioso mas. Cu excepcion cu nan ta wordo transmiti via television of via di internet.

Ayera obispado di Willemstand a duna conoce un decreto na tur sacerdote, religioso y laico di e seis islanan, entre nan Aruba. Monseñor Luis Antonio Secco ta decreta cu ta wordo pospone tur celebracion liturgico. Pero tambe actividadnan di caracter formativo, catisashi, procesion, fiesta parokial y actonan religioso publico te na un proximo aviso. Sinembargo el a laga sa cu lo keda celebra e sacramento di enfermo tumando na cuenta e medidanan di higiena.

Prome cu a wordo conoci e decreto aki, Vicario Apostolico di Aruba, pastoor Andres Makowiec, a recomenda cu esnan cu no por bin misa dominical, tin posibilidad di bin misa den siman cu ta conta cu menos persona, y asina evita aglomeracion grandi.

“Ta bon den siman pa nos probecha pa participa den misa di Eucaristia. Pa probecha e tempo aki pa bo reflexion personal, oracion, confesion,” el a declara via un mensahe di bos.

Igualmente pastoor Andres, a señala cu nos pueblo ta biba momentonan preocupante relaciona cu e casonan di coronavirus na Aruba. E echo aki a lanta diferente pregunta den nan direccion, specialmente pa loke ta trata nan actividad religioso y spiritual. El a combersa cu obispo di nos Diocesis, Monseñor Secco, y a base di nan combersacion e kier bisa lo siguiente: “Na prome luga evita den drenta den panico. Importante pa sigui tur anuncio haci di parti di nos autoridadnan di salubridad publico.”

Tambe el a recorda tur creyente Catolico pa tene cuenta e normanan cu obispado a introduci recientemente, unda ta wordo remarca e parti di higiena personal, y otro medidanan. El a bisa textualmente cu si “algun persona ta sinti mal of sintomanan di molestia pa no participa den Santo Sacrificio di Misa.”

Den e parti aki, Vicario Apostolico di Aruba kier bisa cu ta sumamente importante e misa dominical, caminda nos ta participa directamente. Pero den caso di cualkier sintoma pa evita contagio, e creyentenan Catolico por sigui e celebracion di misa cu nan tin via television of radio. El gradici tur esnan cu ta haci posibel e transmision aki.

E ta haya cu e momentonan aki ta invita nos tur pa busca Dios. “Na e momentonan aki nos no por aleha for di Dios, ni di otro tampoco. Asina ban probecha e momentonan cu nos mester biba pa busca Dios y pa biba uni cu otro,” Vicario Apostolico di Aruba a declara. El a haci un apelacion pa mantene nos responsabilidad cu otro y deposita nos confiansa den Señor.

Mensahe di obispado

Na fin di februari ultimo, Obispado di Willemstand a yega di divulga un comunicado, caminda Monseñor Luis Antonio Secco, a decreta te un proximo aviso, un serie di medidanan preventivo relaciona cu e Covid-19. Entre nan no ricibi Santa Hostia riba lenga, sino den man. Tambe no duna man ora di desea otro paz; y no ta uza awa bendita na entrada y salida di e porta di misa.

Igualmente el a sugeri cu den caso cu bo ta sinti sintomanan di griep, keda cas y yama bo dokter di cas na telefon. Recientemente Monseñor Secco a manda un segundo carta unda e ta afirma loke el a decreta riba su prome carta di dia 29 di februari ultimo.

Aruba ta consisti di un poblacion cu mayoria di nan ta Catolico. Tradicionalmente tur diadomingo e concurencia di e parokianonan den e diferente misa rond di nos isla ta grandi pa celebra Santa Eucaristia. Pero diadomingo awor ultimo tabata riparabel cu e concurencia di parokianonan a baha considerablemente, despues cu a wordo registra e presencia di e coronavirus riba nos isla.