Despues di 6 aña di un proceso huridico largo, corte di casacion na Hulanda a declara e apelacion inadmisibel di ministerio publico (OM) den e caso penal di Alcides Peralta.
Alcides Peralta ta un di e dos Colombianonan cu a muri durante un accion anti droga realisa pa e team di aresto di cuerpo policial na Renaissance Marketplace na aña 2012. E famia di Peralta y esun di Benjamin Castro a entabla dos casonan, tanto civil como penal, y esun ultimo a wordo resolvi finalmente e siman aki. Ainda e caso civil ta pendiente y e lo bin cla eventualmente pa luna di juni venidero.
Den e caso penal aki e famia tambe a pidi compensacion. Den esey hues di prome instancia na Aruba a yega di duna su veredicto. Sinembargo Ministerio Publico (OM) a apela e caso aki y esaki ta locual a haci e proceso mas largo. Te cu nan a bay te ultimo y definitivo instancia di nos sistema di husticia. OM no tabata di acuerdo pa duna e famianan un indemnisacion sino pago di gastonan di entiero so. Pa e prome taki di e famia di Peralta, hues a yega di aproba un suma di 70 mil florin. Nan a apela, ya cu e famia a considera cu e suma tabata mucho abou.
Mientras OM ta haya cu solamente mester a paga na e famianan e gastonan di entiero. Land Aruba ta esun cu tin cu paga e suma di indemnisacion, ya cu e agentenan policial a haci esaki den funcion, y den principio nan no ta personalmente responsabel. Abogado David Kock kende ta representa e famia Peralta no ta na Aruba actualmente pa duna mas detaye di e decision cu a cay den corte na Hulanda e siman aki.
