Apelacion di agente policial contra despido y prohibicion di 9 aña ta faya

Hues siman pasa a considera e apelacion di e agente di polis cu a viola un turista na november 2016 infunda. E agente en cuestion a apela contra e Decreto Nacional pa kit’e for di trabou, pero en bes hues ta mantene decision di Hof, cual ta dicta cu e no mag traha como polis pa un periodo di 9 aña.

E agente en cuestion, kende su nomber no ta aparece riba e publicacion di Rechtspraak.nl (number di caso AUA201701729) pa via di e maneho normal di e sitio, a argumenta cu e manera cu cual a actua pa kit’e for di trabou tabata inhusto, mirando cu e no a haya chens di responsabilisa su mes. Ademas cu pa su caso penal, den cual e ta acusa di malversa propiedad di KPA y viola un turista sexualmente, el a haci un apelacion pa bringa den Hoge Raad, cual ta den proceso. Pues den su concepto, pa via di esaki e decision di Hof no ta irevocabel ainda. A purba tambe pa menciona cu tin otro agentenan policial cu ta haci mescos, pero no ta ricibi castigo pa nan acto.

Integridad di aparato policial afecta
Sinembargo mirando tur esaki, hues a dicta cu e polis su apelacion ta infunda y cu pa via di a actua di e manera con el a actua a atacha e integridad di aparato policial di Aruba, dañando asina e confiansa cu lo mester tin den agentenan policial riba nos isla. Hues no ta haya cu e polis a provee suficiente prueba cu otro agentenan tambe lo ta actuando di tal manera.

Ta aparente cu cada dia mas y mas casonan manera esaki ta sali den luz. Asina por menciona e caso di reporteronan di portal 24ora.com cual Bon Dia a raporta, den cual tambe agentenan policial ta envolvi pa a facilita e uzo di portofon policial, particularmente un mecanico di KPA y tambe un trahado di Bureau Integriteit en Veiligheid (BIV), cual por cierto a haci investigacion riba e mesun polis cu a sexualmente viola un turista.

Un pregunta esencial cu tin cu haci ta: Cuanto casonan berdad ta eyfo den cual por bisa cu polisnan a abusa di nan poder of a actua di forma incorecto? Logicamente lo tin mas caso eyfo cu ta yega te Corte, pues pa e rason aki tin di haci e pregunta.