Den comienso di siman a circula den rednan social un potret di algun hende aparentemente di comunidad Asiatico piscando den e Bubali Plas. Esaki ta algo cu ta pasando pa algun tempo caba. Organisacion ambiental Aruba Birdlife Conservation (ABC) ta haci un apelacion na comunidad Chines specifico y cualkier otro persona cu ta pisca den e area aki pa stop y tene cuenta cu e awanan aki ta contamina.
E potret di algun persona piscando den e area di Bubali Plas a hala hopi atencion. Algun ora despues ABC a reacciona riba nan Facebook cu si algun hende ta reconoce e hendenan aki cu ta sali den e foto piscando na Bubali Wetlands, pa por fabor informa nan cu e awanan na Bubali ta contamina. Nan ta informa cu no por come e piscanan cu wordo gara den e areanan aki pa motibo cu e lo ta peligroso pa bo salud. E organisacion ambiental tin intencion pa publica un anuncio den idioma di Mandarin pa informa e comunidad Chines di Aruba riba e problemanan di salubridad cu piscanan den e area aki por trece si wordo consumi. Nan tambe kier enfatisa cu e area aki ta un sanctuario di parha anto piscamento akinan ta causando daño na e Bubali Wetlands.
Ultimo update riba areanan pa protege
Manera nos a yega di publica caba, riba 6 di februari 2013, 21 miembro di parlamento di Aruba a vota unanimamente na fabor pa un mocion cu lo protege 16 areanan di naturalesa. Bubali Wetlands ta un di e areanan aki cu mester keda protegi tambe. E areanan aki lo mester wordo declara como areanan importante di naturalesa cual lo mester wordo incorpora na Parke Nacional Arikok. Segun ABC, e areanan aki tin un importancia grandi localmente como tambe internacionalmente pa locual ta trata bida di parhanan migrante. Na final di 2016, ABC a lansa un peticion cu tabata na direccion di prome minister Mike Eman, parlamento di Aruba y gobernador di Aruba pa stop e destruccion di areanan di naturalesa importante pa nos pais. Mas cu 11.000 persona a firma e peticion aki. Na februari di 2017, mas cu cuater aña despues di e voto na parlamento pa aproba e mocion, gobierno solamente a percura pa protege 1 area so di e 16 areanan riba e lista.
