Aparato sismologico moderno lo duna miho informacion instala na IPA

Bon Dia Aruba a tene entrevista cu Branden Christensen di OSOP Panama kende ta un experto cu ta presente na Aruba pa loke ta e presentacion di e instalacion di e aparato sismologico nobo na San Nicolas.

El a splica cu henter e sistema ta mas moderno cu locual cu nos conoce den e sentido cu henter un sistema electronico ta hinca den solamente un aparato. Esaki ta permiti pa instala network local pa por a instala un sismometer na e scol y comunica na e instituto central di meteo sin mester haci instalacionnan adicional.

Aruba no tin algo asina aki pues e ta e prome den su sorto. A scoge IPA pa dos motibo, pa di prome pa e oportunidad educacional pa promove e tipo di estudio aki cu no ta mucho popular aki na Aruba. Y e di dos motibo segun sr. Christensen ta un bonus, como cu e scol ta situa na un area hopi trankil cual ta ideal pa e reading di e sismometer. E ta enfatisa cu e ta lesa informacion mucho mas miho cu si por ehempel el a wordo instala cerca di aeropuerto.

Duracion

E aparato lo keda eynan te ora cu e muri, nan ta diseña pa tin un duracion di 5 of mas aña pero ta dura mucho mas cu esaki pues sigur e lo keda na IPA pa basta aña, e experto a termina bisando.