Aparato pa test Zika na Aruba mes, ta costoso

Testnan pa loke ta casonan sospechoso di Zika ta wordo manda pa Hulanda esaki no ta disponibel na Aruba ainda pa falta di financia segun Maribel Tromp di Despa. Tambe no ta mira e necesidad pa tin un aparato asina costoso cu no ta bay wordo uza hopi. Mientrastanto ta trahando cu protocol y ley cu hospital pa loke ta e decision di aborto den caso cu un mama na estado contagia cu Zika.

Unabes cu manda e testnan pa Hulanda e ta tarda dos pa tres di pa haya e resultadonan bek segun Sra. Tromp. A puntra Sra. Tromp dicon e test aki no por wordo haci aki na Aruba mes, pa cual el a splica cu ta test PCR cual ta un tecnica cu ta wordo aplica pa un aparato cu no tin actualmente den e islanan Caribe como cu e ta hopi costoso. House kit, of kit comercial cu ta test riba serologia (e estudio cu ta permiti comproba presencia di antibodies den sanger), no ta disponibel mundialmente ainda pa Zika como cu e ta traha no specifico. “Nos tin e capacidad si pa manda te na un otro hospital na Rotterdam cu por duna nos e facilidad ey.” Sra. Tromp a enfatisa cu ta e costo di e aparato ta e motibo principal cu ningun isla den region y tampoco Aruba tin e, e cantidad di testnan cu lo haci cu e mashin aki no ta bal e ora e costo pa tin e mashin aki na Aruba.

Hende muhe na estado

Pa loke ta trata e peliger di mas grandi pa loke ta e virus di Zika te cu aworaki ta hende muhe na estado, manera nos a bay ta publica. A puntra Sra. Tromp si Despa ta haya yamada di hende muhe na estado buscando conseho. El bisa cu ta haya yamada regularmente, si ta specificamente cu ta bin di personanan na estado, no sa, pero ta atende cu tur yamada.

Si nos analisa un situacion extremo unda cu un persona na estado wordo confirma cu Zika, a puntra Sra. Tromp kico lo haci mirando e riesgo cu e baby tin pa nace cu defecto manera e tantisimo casonan na Brazil. Y si lo conseha un abortus of no den e caso aki. El a contesta cu esakinan ta preguntanan cu ta tratando cu hospital y ginecologonan, ta buscando confirmacion y wak e parti legal di e parti di abortus. El a bisa cu otro siman lo tin contesta riba esaki.