Director di Aruba Port Authority (APA), Jossy Figueroa a anuncia cu nan lo cuminsa un trabou di dragamento di e canal di waf na Oranjestad pa asina ricibi barconan crucero mas grandi cu lo desea bin Aruba.
E proyecto aki tin un balor di 4 miyon florin. E ta inclui tambe trabou di adaptacion na waf di Barcadera. APA mes ta para responsabel pa e financiamento di e trabou aki. Nan ta haci nan inversion di un forma responsabel y no aventurero, segun sr. Figueroa.
E ta considera e proyecto aki uno hopi importante, ya cu e ta genera entrada na APA, pero principalmente e lo tin beneficio pa nos industria turistico. Aruba ta wordo considera un destinacion di marca y turistanan crucero ta dispuesto di paga mas placa pa bin Aruba compara cu otro destinacion di Caribe. Considerando cu gobierno ta e principal accionista di APA, pueblo di Aruba lo beneficia di e desaroyo aki, segun sr. Figueroa.
Trabou di dragamento
Baggerbedrijf De Boer ta e compania Hulandes cu a gana e destaho publico cu e miho prijs, y ya caba e hopper dredger “Elbe” ta na caminda. Nan ta cuminsa pronto cu e prome fase di nan trabou di draga e canal na Playa. Esaki ta bay dura entre cuater pa cinco siman y ta spera di keda cla na mei. Pero e ta bay tuma mas tempo, ya cu nan ta bay traha den e proyecto di adaptacion di e waf na Barcadera. Tin companianan Arubiano cu tambe ta envolvi den e ultimo proyecto aki.
E tera bon cu a wordo coba nan lo pone den e area di e waf di Barcadera. Pero e no ta suficientemente bon pa uza den nos beachnan. Locual ta bira un reto ta kico nan ta bay haci cu e material aki 3 aña. E ta un material di balor cu mester evalua cual lo bira su uzo. Eventualmente e lo wordo uza na Barcadera of den otro sitio.
El a indica cu den e proyecto aki nan a tene den consideracion diferente aspecto entre nan aspecto financiero y tambe proteccion di nos medio ambiente. Aunke e trabou aki ta uno grandi nan lo minimalisa su impacto den nos medio ambiente submarino.
E trabou riba e canal aki ta uno di mantencion ya cu lo cual a bin riba e canal aki durante e ultimo añanan. Esey ta locual nan ta bay kita durante e trabou di dragamento. Por ta un reaccion lo ta pa kico no a keda cu e mesun tipo di barco crucero cu ta biniendo nos isla. Segun sr. Figueroa e companianan di crucero cada aña ta introduci barco crucero mas grandi. Nan ta crece den largura. Na luna di mei nos ta bay ricibi barco crucero cu pa prome biaha ta bishita nos isla cu tin e largura di 339 meter.
Segun APA su expertonan e tipo di barco aki por drenta den nos waf. Sinembargo e companianan crucero den caso aki, Royal Caribbean Cruise ta prefera pa APA condiciona miho nos waf pa yegada di nan barconan. Esaki tin di haber cu e trabou di mantencion di e canal cu mester tin minimo 12 meter. Esey tabata e profundidad cu tabatin despues di e ultimo trabou cu APA a haci den e canal.
Sr. Figueroa a bisa cu e canal aki a wordo prepara mas cu 60 aña pasa. 40 aña pasa a haci algun trabou pa asina prepara ora cu a bin cu e barco di container. Pero mucho mas no a wordo haci fei di e tempo ey. P’esey nan ta considera importante e trabou cu ta biniendo no ta solamente pa e cruceronan nobo, pero pa mantene e canal den su profundidad di por lo menos 12 meter.
Proteccion medio ambiente
Sr. Figueroa a bisa cu departamento di Naturalesa y Medio Ambiente ta envolvi den e proyecto aki pa loke ta trata asunto di salvaguardia proteccion di nos coralnan y manglonan. Sinembargo el a laga sa cu te aworaki no tin niun organisacion no gubernamental (NGO’s) y tampoco no tin un estudio previo di e impacto ambiental di e trabou aki.
Director di APA a bisa cu gobierno a exigi nan pa realisa e studio aki y a base di e estudio ey nan lo bay haci e proyecto. “Kiermen tur e recomendacionnan cu tin den dje nos ta bay cumpli cu nan.” E ta argumenta cu APA tambe ta di opinion cu e proyecto aki mester ta uno sostenibel y duradero.
Pa loke ta e envolvimento di NGO’s den e proyecto aki, APA no a hacie. Den e caso aki nan a envolvi departamento di Naturaleza y Medio Ambiente ya cu e ta e departamento oficial di gobierno cu nan ta traha cu nan. E ta kere cu ora e trabou di cobamento lo cuminsa nan lo bay acerca e grupo mas grandi di NGO’s. Den e prome fase cu ta un trabou di saca locual tabatin den e canal di 12 meter, “bo no ta bay kibra nada eybounan.” APA no ta haya cu ta necesario pa envolvi nan. Pero unabes cu nan ta cuminsa cu e proyecto di cobamento, nan lo bay acerca mas instancia pa cada un di nan duna nan opinion.
Financiamento
“APA ta paga tur cos”, el a bisa. APA tin mas inversion cu ta bay haci durante aña. Nan ta tirando un bon bista riba e gastonan cu nan tin. E situacion di APA ta mustra bon cu nan por haci e tipo di inversion aki, sin cu nan ta hinca e compania den problema. Nan kier keda stabiel y nan kier cu nan situacion financiero por keda solido.
Nan ta bay fia e placa pero sin cu nan ta haya problema den nan propio compania ya cu otro inversionnan ta na caminda. Como inversion grandi nan tin e proyecto di Port City pa otro aña. Pero tambe e adkisicion di un tugboat na balor di alrededor 15 miyon florin e aña aki.
Pa e proyecto di e waf di carga di Barcadera tambe APA a haci un fiansa miyonario, y tur cos ta bayendo bon y APA ta cumpliendo cu e compromiso aki.
