Durante conferencia di prensa cu a tuma luga dialuna di minister Benny Sevinger encarga cu Infrastructura el a contesta diferente pregunta specifico haci pa miembronan di prensa. E preguntanan tabata specificamente di tereno otorga na Sra. Arends, despues di un conferencia di prensa mas trempan e dia ey di partido politico MEP unda cu nan a trece e informacion ey dilanti.
Terenonan waf
Pa loke ta desaroyonan andando cu terenonan di waf tambe tin hopi cu ta wordo bisa cu tin partimento pa cierto personanan, incluyendo Sra. Arends un biaha mas. Segun Sr. Sevinger ta splica, e terenonan na waf ta terenonan di Aruba Ports Authority (APA). “Nos di departamento di Infra hunto cu APA y Poorts Amsterdam ta trahando un Business Plan di con nos ta bay desaroya e terenonan aki. APA a cumpra e propiedadnan aki e tempo ey for di diferente doñonan den Freezone e tempo ey. Kiermen APA a paga pa e terenonan/propiedadnan aki mas cu 18 miyon. APA kier su placa bek. Simplemente nos no ta bay duna e terenonan cu ta di APA cu ta eigenlijk un propiedad mescos cu abo tin un cas y bo ta bende pa bo por haya locual cu bo a inverti den bo cas. APA lo traha hunto cu nos un plan, e plan aki lo wordo reparti den diferente plot. Tin mas di 30 interesado pa desaroya den e area ey. Ta bay tin un comision cu ta bay evalua cada un di e peticionnan aki cu a pidi pa desaroya den e area ey. A reis di diferente criterianan, APA lo dicidi ken ta e desaroyadonan cu lo por haya oportunidad di desaroyo eynan. Un di e criterianan cu sigur gobierno ta exigi ta: Cu loke sea cu bo bin cun’e eynan no por tin influencia riba caya grandi. Esaki kiermen no no por tin Malls, tiendanan cu ta bay influencia mainstreet. Esey ta un di e criterianan primordial. Otro criterianan ta bo business plan, si bo tin placa, si bo placa ta bin for di un instancia legal cu Banco Central di Aruba ta bay controla etc. etc.” e mandatario a bisa. Cu esaki e ta bisa cu no tin ningun hende tin un “toezegging” riba e terenonan ey. Ta di APA nan ta y na momento cu e plan ta cla, lo publica esaki y cada hende lo haya e oportunidad of desaroyadonan lo haya e oportunidad pa participa y haya e plot nan ey.
E mandatario a sigui splica di e proceso: “Completamente transparente, nada di haber cu minister y mucho menos cu minister a entrega e terenonan aki. Atrobe, ta trata di ‘fabeltjes’, redashi, purba susha nomber di hende, nos conoce esey caba. Kiermen si nan tin prueba di esey y cu nos a duna hende e terenonan ey caba, y cu nan a pasa notario, nan por bay hypotheek kantoor cu tin tur registra. Bay y mustra nos cua hendenan a haya e terenonan eynan via di notario,” Minister Sevinger a bisa.
Ponencia Sero Colorado
“Si tin desaroyadonan pa Sero Colorado cu kier desaroya un hotel, nos lo duna un opcion riba esaki. Pa bo cumpli cu e opcion aki y bin cu e placa pa traha e hotel (150 miyon – 90 miyon), pa bo por pasa un tereno na notario, ta un caminda di cruz. Gobierno anterior a duna 1 desaroyado tur e terenonan den Seroe Colorado. Nan tabatin e casi 8 aña, 1.3 miyon meter cuadra, y nan no por a cumpli cun’e. Awo kico esey kiermen y cu ami mester bisa, cu nan a duna 1.3 miyon meter cuadra na un persona y cu eynan tin corupcion?, no, e persona ey a haci un plan, el a entrega su plan, gobierno anterior a evalua y kere cu e persona por cumpli cu e plan. Pero na final e no por a cumpli cu e plan pasobra e no por a bin cu e placa y no por a bin cu e rekisitonan y pues a perde e opcion.”
Finalmente e mandatario a bisa cu si tin un persona, Croes, Arends, Tromp, ken sea cu e ta, cu a pidi pa desaroya un proyecto di hotel na San Nicolas y e tereno ta disponibel, ta dun’e un opcion riba dje. Si Glenbert Croes pidie, e tambe ta hay’e. Pero bo tin cu cumpli cu e rekisitonan den dje.
90 mil meter cuadra
Atrobe si Leoncita a haya 90 mil meter cuadra bo ta bay y puntra hypotheek kamer si el a haya esaki y na unda. No bisa un cos sin cu bo por prueba esaki, bay hypotheekkantoor unda cu tur cos ta registra, pues tur cu kier sa si Mep ta papia berdad por bay eynan, e minister a keda enfatisa. Locual cu nos matutino a publica caba ta cu e minister a nenga cu peticion a drenta cerca dje pa 90 mil meter cuadra y mucho menos cu un persona a haya esaki. El a enfatisa cu tur hende por entrega denuncia si nan ta sinti cu lo tin di haber cu corupcion. “P’esey nos ta biba na Aruba, p’esey nos ta biba den un estado di derecho. Pero no papia susha nomber di hende sabiendo cu bo sa cu di e forma cu bo ta haci esey ta dificil pa bay corte corta tur e sushamentonan aki.” E minister a enfatisa cu e no ta bay corte pa e cosnan aki, e ta laga esey pa esunnan cu ta kere cu nan tin suficiente prueba of nan por publica nan pruebanan. “Nos conoce e partido MEP hopi biaha cu ta custuma di susha nomber di hende, pero nada di tuma accion.
