APA ta bin preparando pa ora barconan crucero cuminsa drenta bek

Minister di Turismo, Dangui Oduber, a anuncia un fecha tentantivo entre 15 di juni y 1 juli pa habri nos frontera como parti di e proceso gradual pa bay na e normal nobo.

E proceso di flexibilidad ta wordo tuma teniendo na cuenta tur medida y regla di higiena cu e pandemia di Coronavirus/Covid-19 ta exigi di nos tur. Ya caba ATA ta bin trahando cu nan diferente socio di nos industria turistico pa ora cu e lockdown lo wordo lanta, tur procedura ta cla.

E crisis aki a touch Aruba Port Authority (APA) tambe. Dia 13 di maart tabata e ultimo dia cu nan a ricibi un barco crucero den waf. Na e momento aki e medida ta vigente te cu 26 di juni. Si eventualmente e crisis team ta dicidi di habri e frontera denter di e fechanan tentativo cu a wordo anuncia, posiblemente te cu 26 di juni, operacion di crucero den e nos waf ta para. Pero te ainda niun decision a cay riba e asunto aki.

Director di Aruba di APA, Marc Figueroa a yega di declara na Bon Dia Aruba cu mientras cu no tin un cura of un vacuna pa e virus, nos tin cu bay siña con nos ta bay biba cu e virus aki. Si gobierno ta dicidi di habri frontera, y barconan di crucero ta cuminsa drenta bek, esaki ta exigi di APA con nan ta bay adapta nan operacion pa acomoda e hendenan. Pero tambe pa garantisa cu no solamente e pasahero ta safe, pero nan empleadonan y comunidad di Aruba. El a señala cu p’esey ta importante e distanciamento social y tur e reglanan di higiena conoci pa evita e contagio di Covid-19.

Ya APA ta bin trahando riba e plannan, ora cu ta yega e dia cu nos pais lo sigui ricibi bishita di nos turistanan crucero. Figueroa a declara cu nan ta bezig bin trahando caba riba e plannan, no solamente riba aspecto di operacion, pero tambe pa nan empleadonan, con nos ta bay den e normal nobo.

Pa loke ta e companianan crucero, APA ta bin trahando cu nan stakeholder internacional manera Florida Caribbean Cruise Association y ATA, pues e cruise team, caminda nan ta delinea e maneho, y traha riba plannan pa acomoda e barconan crucero, manteniendo e siguridad di salud na prome luga.